Хитайниң қорғас хәлқара базирида сақал вә яғлиқни чәклиши чәтәл мухбирлириниң диққитини қозғиған

Мухбиримиз әркин
2019-04-29
Елхәт
Пикир
Share
Принт

Хитай һөкүмити хитай-қазақистан чеграсидики «қорғас хәлқара әркин базири» ниң хитайға қарашлиқ бөликидә яғлиқ вә сақални чәклигән.

27‏-Апрел күни бир қисим чәтәллик мухбирлар мәзкур хәлқара базарни зиярәт қилған болуп, базарниң хитай тәрипидики ғайәт зор тахтайға есилған сақал вә яғлиқниң чәклинидиғанлиқи һәққидики уқтуруш мухбирларниң диққитини қозғиған. Фирансийә агентлиқиниң хәвиридә қәйт қилинишичә, бу уқтуруш «хитай һөкүмитиниң мусулманлар көп санлиқтики мәзкур районда йүргүзүватқан қаттиқ бихәтәрлик сияситиниң очуқ бешаритини берип туридикән».

Хәвәрдә, бу хил қаттиқ бихәтәрлик сиясити ши җинпиңниң «бир бәлвағ бир йол пилани» ни әмәлгә ашурушида һалқилиқ амил, дәп қарилидиғанлиқи тәкитләнгән. Шуниңдәк мәзкур бихәтәрлик сияситиниң бир милйондәк уйғур, қазақ, қирғиз вә башқа мусулман түрки хәлқләрни бейҗиң һөкүмити «кәспи маһарәт мәркизи» дәп тәрипләватқан йиғивелиш лагерлириға қамашни өз ичигә алидиғанлиқи илгири сүрүлгән. Хәвәрдә йәнә буниң пакистанлиқ тиҗарәтчиләргә тәсир қилғанлиқи, уларниң уйғур аяллириниң тутқун қилинғанлиқи әскәртилип, буниң оттура асия, пакистан рәһбәрлирини осал әһвалға чүшүрүп қойғанлиқи тәкитләнгән.

Хәвәрдә баян қилинишичә, хитайниң сақал вә яғлиқни чәклиши сәвәблик мухбирлар өмикидики бир һиҗаплиқ қазақ аял журналист бу базарға кирәлмигән. У, өзиниң һиҗап билән хитайниң бихәтәрлик тәкшүрүшидин өтәлмәйдиғанлиқини билдүрүп, хәлқара базарға кирмигән. Хәвәрдә қәйт қилинишичә, мухбирларниң хәлқара базарниң хитайға қарашлиқ бөликидики уқтурушқа йеқинлишиши чәкләнгән болуп, хәвәрдә буниң мәзкур базарни икки дөләт ортақ башқуруш тоғрисидики қанунға хилап икәнлики тәкитләнгән. Хәвәрдә йәнә қазақистан билән пакистанниң хитайни қоллаватқанлиқи, қазақистан хитайдики қазақларниң бихәтәрлики хитай билән болған мунасивәтләрдики «муһим амил» десиму, лекин униң йеқинда йәнә хитайниң 3 хил күчләргә қарши күришини қоллайдиғанлиқини билдүргәнлики, пакистан баш министири имран ханниң йеқинда «малийә вақти» гезитиниң мухбириға бу районда «йүз бериватқан һадисиләрни билмәйдикәнмән» дәп турувалғанлиқи тәкитләнгән.

Пикирләр (0)
Share
Толуқ бәт