Xitayning qorghas xelq'ara bazirida saqal we yaghliqni cheklishi chet'el muxbirlirining diqqitini qozghighan

Muxbirimiz erkin
2019-04-29
Élxet
Pikir
Share
Print

Xitay hökümiti xitay-qazaqistan chégrasidiki "Qorghas xelq'ara erkin baziri" ning xitaygha qarashliq bölikide yaghliq we saqalni chekligen.

27‏-Aprél küni bir qisim chet'ellik muxbirlar mezkur xelq'ara bazarni ziyaret qilghan bolup, bazarning xitay teripidiki ghayet zor taxtaygha ésilghan saqal we yaghliqning cheklinidighanliqi heqqidiki uqturush muxbirlarning diqqitini qozghighan. Firansiye agéntliqining xewiride qeyt qilinishiche, bu uqturush "Xitay hökümitining musulmanlar köp sanliqtiki mezkur rayonda yürgüzüwatqan qattiq bixeterlik siyasitining ochuq bésharitini bérip turidiken".

Xewerde, bu xil qattiq bixeterlik siyasiti shi jinpingning "Bir belwagh bir yol pilani" ni emelge ashurushida halqiliq amil, dep qarilidighanliqi tekitlen'gen. Shuningdek mezkur bixeterlik siyasitining bir milyondek Uyghur, qazaq, qirghiz we bashqa musulman türki xelqlerni béyjing hökümiti "Kespi maharet merkizi" dep teriplewatqan yighiwélish lagérlirigha qamashni öz ichige alidighanliqi ilgiri sürülgen. Xewerde yene buning pakistanliq tijaretchilerge tesir qilghanliqi, ularning Uyghur ayallirining tutqun qilin'ghanliqi eskertilip, buning ottura asiya, pakistan rehberlirini osal ehwalgha chüshürüp qoyghanliqi tekitlen'gen.

Xewerde bayan qilinishiche, xitayning saqal we yaghliqni cheklishi seweblik muxbirlar ömikidiki bir hijapliq qazaq ayal zhurnalist bu bazargha kirelmigen. U, özining hijap bilen xitayning bixeterlik tekshürüshidin ötelmeydighanliqini bildürüp, xelq'ara bazargha kirmigen. Xewerde qeyt qilinishiche, muxbirlarning xelq'ara bazarning xitaygha qarashliq bölikidiki uqturushqa yéqinlishishi cheklen'gen bolup, xewerde buning mezkur bazarni ikki dölet ortaq bashqurush toghrisidiki qanun'gha xilap ikenliki tekitlen'gen. Xewerde yene qazaqistan bilen pakistanning xitayni qollawatqanliqi, qazaqistan xitaydiki qazaqlarning bixeterliki xitay bilen bolghan munasiwetlerdiki "Muhim amil" désimu, lékin uning yéqinda yene xitayning 3 xil küchlerge qarshi kürishini qollaydighanliqini bildürgenliki, pakistan bash ministiri imran xanning yéqinda "Maliye waqti" gézitining muxbirigha bu rayonda "Yüz bériwatqan hadisilerni bilmeydikenmen" dep turuwalghanliqi tekitlen'gen.

Toluq bet