Гумадики партлашта өлгән ғәйрәт мамут хитайниң «җумһурийәт медали» намзатлиқиға киргүзүлгән

Мухбиримиз ирадә
2019-08-29
Елхәт
Пикир
Share
Принт

Хитайдики «хәлқ тори» ниң 28-авғуст күнидики хәвиригә қариғанда, хитай һөкүмити бу йил хитай хәлқ җумһурийити қурулғанлиқиниң 70 йиллиқини хатириләш мунасивити билән тунҗи қетим «җумһурийәт ордени» вә «җумһурийәт шәрәп нами» намзатлирини баһалап чиқишни йолға қоюп, буниңға көрситилгән намзатлириниң исимликлирини елан қилған.

Диққәт қозғайдиғини шуки, «җумһурийәт шәрәп нами» мукапатиниң 28 нәпәр намзати ичидә 2016-йили гума наһийәсидә йүз бәргән бомба партлаш вәқәсидә һаятидин айрилған, әйни чағдики гума наһийәлик сақчи идарисиниң сабиқ муавин башлиқи ғәйрәт мамут орун алған.

«Хәлқ тори» дики бу уқтурушта ғәйрәт мамутниң асасий қатламда сақчилиқ хизмитигә қатнашқан 7 йилдин буян иҗтимаий аманлиқ вә җәмийәт муқимлиқини сақлап, узун муддәтлик әминликини капаләткә игә қилиш йолида алдинқи сәптә батурлуқ билән күрәш қилғанлиқи, «террорлуққа қарши уруш» ниң алдинқи сепидә орун елип, 2016-йили 9-айда гума наһийәсидики бир а дәриҗилик қачқунни қоғлаватқанда өзини партлитиш характерлик һуҗумға учрап қәһриманларчә қурбан болғанлиқини қәйт қилған.

Радийомиз әйни чағда гумада йүз бәргән бу партлаш вәқәсини йәрлик сақчи органлиридин игилигән учурлар асасида тәпсилий хәвәр қилған. Радийомиз игилигән учурларда мәзкур вәқәниң гуманиң көктерәк йеза 23-кәнтидә йүз бәргәнлики, шу күни ғәйрәт мамутниң идаридики бир хитай сақчи ишқа кәлмигәнлики үчүн аилә тәкшүрүшигә чиққанлиқи вә туюқсиз байқалған бир гуманлиқ вәқәни тәкшүрүш үчүн бир өйниң гәмисигә чүшкәндә бомба партлап кетип нәқ мәйданда өлгәнлики ашкариланған иди.

Чәтәлләрдики уйғур паалийәтчилиридин америка уйғур бирләшмиси рәиси елшат һәсән әпәнди бу һәқтә тохтилип, ғәйрәт мамутниңму әмәлийәттә хитай һөкүмитиниң райондики сиясәтлириниң қурбани икәнликини тәкитлиди.

Униң әскәртишичә, юқириқи уқтурушта «җумһурийәт ордени» вә «дөләт шәрәп нами» ниң хитайниң қурулуши вә тәрәққияти үчүн көрүнәрлик төһпә қошқанларни тәқдирләшни мәқсәт қилғанлиқи әскәртилгән болуп, униңға нурғунлиған хитай тәтқиқатчилар, пән-техника хадимлири билән бир қатарда бир нәпәр җенидин айрилған уйғур «қурбан» ниң таллинишиму диққәт қозғайдиған бир селиштурма икән.

Пикирләр (0)
Share
Толуқ бәт