Gumadiki partlashta ölgen gheyret mamut xitayning "Jumhuriyet médali" namzatliqigha kirgüzülgen

Muxbirimiz irade
2019-08-29
Élxet
Pikir
Share
Print

Xitaydiki "Xelq tori" ning 28-awghust künidiki xewirige qarighanda, xitay hökümiti bu yil xitay xelq jumhuriyiti qurulghanliqining 70 yilliqini xatirilesh munasiwiti bilen tunji qétim "Jumhuriyet ordéni" we "Jumhuriyet sherep nami" namzatlirini bahalap chiqishni yolgha qoyup, buninggha körsitilgen namzatlirining isimliklirini élan qilghan.

Diqqet qozghaydighini shuki, "Jumhuriyet sherep nami" mukapatining 28 neper namzati ichide 2016-yili guma nahiyeside yüz bergen bomba partlash weqeside hayatidin ayrilghan, eyni chaghdiki guma nahiyelik saqchi idarisining sabiq mu'awin bashliqi gheyret mamut orun alghan.

"Xelq tori" diki bu uqturushta gheyret mamutning asasiy qatlamda saqchiliq xizmitige qatnashqan 7 yildin buyan ijtima'iy amanliq we jem'iyet muqimliqini saqlap, uzun muddetlik eminlikini kapaletke ige qilish yolida aldinqi septe baturluq bilen küresh qilghanliqi, "Térrorluqqa qarshi urush" ning aldinqi sépide orun élip, 2016-yili 9-ayda guma nahiyesidiki bir a derijilik qachqunni qoghlawatqanda özini partlitish xaraktérlik hujumgha uchrap qehrimanlarche qurban bolghanliqini qeyt qilghan.

Radiyomiz eyni chaghda gumada yüz bergen bu partlash weqesini yerlik saqchi organliridin igiligen uchurlar asasida tepsiliy xewer qilghan. Radiyomiz igiligen uchurlarda mezkur weqening gumaning köktérek yéza 23-kentide yüz bergenliki, shu küni gheyret mamutning idaridiki bir xitay saqchi ishqa kelmigenliki üchün a'ile tekshürüshige chiqqanliqi we tuyuqsiz bayqalghan bir gumanliq weqeni tekshürüsh üchün bir öyning gemisige chüshkende bomba partlap kétip neq meydanda ölgenliki ashkarilan'ghan idi.

Chet'ellerdiki Uyghur pa'aliyetchiliridin amérika Uyghur birleshmisi re'isi élshat hesen ependi bu heqte toxtilip, gheyret mamutningmu emeliyette xitay hökümitining rayondiki siyasetlirining qurbani ikenlikini tekitlidi.

Uning eskertishiche, yuqiriqi uqturushta "Jumhuriyet ordéni" we "Dölet sherep nami" ning xitayning qurulushi we tereqqiyati üchün körünerlik töhpe qoshqanlarni teqdirleshni meqset qilghanliqi eskertilgen bolup, uninggha nurghunlighan xitay tetqiqatchilar, pen-téxnika xadimliri bilen bir qatarda bir neper jénidin ayrilghan Uyghur "Qurban" ning tallinishimu diqqet qozghaydighan bir sélishturma iken.

Toluq bet