Хитайдики бир ширкәт чошқа гөшини «һалал» дәп сатқан

Мухбиримиз әзиз
2016-04-28
Елхәт
Пикир
Share
Принт

Фирансийә агентлиқиниң хәвиригә қариғанда, хитайдики «сәйвәйшяң һалал йемәкликлири ширкити» өзлириниң мусулманчә шәкилдә тәйярланмиған, шундақла тәркибидә чошқа гөши мәлум салмақни игилигән 50 милйон америка доллири қиммитидики һәр хил йемәкликни асия вә оттура шәрқтики мусулманлар базирида сатқан.

Хәвәрдә ейтилишичә, мәзкур ширкәт хитайдики хәлқаралиқ һалал йемәк-ичимәк содиси билән мәшғул болғучи әң чоң ширкәт икән. Уларниң мәһсулатлири асасән асиядики һәрқайси мусулман базарлирида сетилидикән, шундақла сәуди әрәбистаниғичә експорт қилинидикән.

Ширкәт директори дең җиҗүн мухбирларға мусулманларниң һарақ ичмәйдиғанлиқини вә тамака чәкмәйдиғанлиқини, шундақла бәзи һайванларниң гөшини йемәйдиғанлиқини ейтип бәргән. Әмма буниң қайси һайванниң гөши икәнлики соралғанда «мән унтуп қаптимән» дәп җаваб бәргән.

Мәзкур мусулманчә йемәклик ширкити хитайдики мусулман милләтләрдин бири болған туңганлар бирқәдәр мәркәзлик олтурақлашқан ниңшя туңган аптоном районида икән. Завутниң өзлири ишлигән елан характерлик филимларниң биридә завут ишчилириниң тамақтин аввал җириңлитип ромка соқуштуруп пива ичиватқанлиқи тәсвирләнгән.

Дең фамилилик хитай директор бу һәқтә соралған соалға «қизил һарақ ичиш худди һалал йемәклик йегәнгә охшаш инсан бәдинигә вә уларниң саламәтликигә бәкму пайдилиқ» дегән.

Чәтәл мутәхәссислири изчил һалда «хитай ишләпчиқарған һалал йемәкликләрниң тәйярлинишида изчил мәсилә мәвҗут» дәп қарап келиватқанлиқи мәлум.

Өткән йили шиән шәһиридә нәччә йүз туңган мусулман «һалал» вивискиси есилған ресторанларда испиртлиқ ичимлик сетилғанлиқиға қарши намайиш қилған болса, чиңхәй өлкисидики мусулманлар чошқа гөшидин ясалған қеза сатқан болкиханини пачақливәткән иди.

Пикирләр (0)
Share
Толуқ бәт