Xitaydiki bir shirket choshqa göshini "Halal" dep satqan

Muxbirimiz eziz
2016-04-28
Élxet
Pikir
Share
Print

Firansiye agéntliqining xewirige qarighanda, xitaydiki "Seyweyshyang halal yémeklikliri shirkiti" özlirining musulmanche shekilde teyyarlanmighan, shundaqla terkibide choshqa göshi melum salmaqni igiligen 50 milyon amérika dolliri qimmitidiki her xil yémeklikni asiya we ottura sherqtiki musulmanlar bazirida satqan.

Xewerde éytilishiche, mezkur shirket xitaydiki xelq'araliq halal yémek-ichimek sodisi bilen meshghul bolghuchi eng chong shirket iken. Ularning mehsulatliri asasen asiyadiki herqaysi musulman bazarlirida sétilidiken, shundaqla se'udi erebistanighiche éksport qilinidiken.

Shirket diréktori déng jijün muxbirlargha musulmanlarning haraq ichmeydighanliqini we tamaka chekmeydighanliqini, shundaqla bezi haywanlarning göshini yémeydighanliqini éytip bergen. Emma buning qaysi haywanning göshi ikenliki soralghanda "Men untup qaptimen" dep jawab bergen.

Mezkur musulmanche yémeklik shirkiti xitaydiki musulman milletlerdin biri bolghan tungganlar birqeder merkezlik olturaqlashqan ningshya tunggan aptonom rayonida iken. Zawutning özliri ishligen élan xaraktérlik filimlarning biride zawut ishchilirining tamaqtin awwal jiringlitip romka soqushturup piwa ichiwatqanliqi teswirlen'gen.

Déng famililik xitay diréktor bu heqte soralghan so'algha "Qizil haraq ichish xuddi halal yémeklik yégen'ge oxshash insan bedinige we ularning salametlikige bekmu paydiliq" dégen.

Chet'el mutexessisliri izchil halda "Xitay ishlepchiqarghan halal yémekliklerning teyyarlinishida izchil mesile mewjut" dep qarap kéliwatqanliqi melum.

Ötken yili shi'en shehiride nechche yüz tunggan musulman "Halal" wiwiskisi ésilghan réstoranlarda ispirtliq ichimlik sétilghanliqigha qarshi namayish qilghan bolsa, chingxey ölkisidiki musulmanlar choshqa göshidin yasalghan qéza satqan bolkixanini pachaqliwetken idi.

Toluq bet