Шавкәт мирзийойеф өзбекистанниң мутләқ алий рәһбири болаламду

Мухбиримиз қутлан
2018-02-17
Елхәт
Пикир
Share
Принт

Өзбекистанниң ислам кәримофтин кейинки йеңи президенти шавкәт мирзийойеф һакимийәт бешиға чиққиниға бир йилдин ашқанда, хәлқара таратқулар униң оттура асиядики бу дөләтниң мутләқ алий рәһбиригә айланғанлиқини илгири сүрмәктә.

«Азадлиқ радийоси» өзбек бөлүминиң торида йеқинда «шавкәт мирзийойеф қандақ қилип өзбекистанниң мутләқ алий рәһбиригә айланди» сәрләвһилик бир узун хәвәр анализи елан қилинған.

Хәвәрдә көрситилишичә, бу йил 31-январ күни президент шавкәт мирзийойеф ахири кәримоф дәвридин қәп қалған әң ахирқи мустәһкәм қозуқ - өзбекистан дөләт хәвпсизлик идарисиниң башлиқи рустәм инайәтофни ғулатқан. Буниң билән у президентлиқ тәхтигә чиққандин буян өзигә келидиған әң чоң тәһдитни түгитип, өзиниң мутләқ алий рәһбәрлик һоқуқини мустәһкәмлигән.

Мәлумки, өзбекистан мустәқил болған 25 йил җәрянида «өзбекистан» дегән сөз билән «президент кәримоф» дегән сөз гоя мәнидаш сөздәк қоллинилған. Шавкәт мирзийойеф гәрчә кәримоф дәвридә өзбекистан һөкүмитиниң баш министирлиқ вәзиписини атқузған болсиму, әмма уму бу дөләттики башқа барлиқ әмәлдарларға охшашла кәримофниң «көләңгиси» болуп кәлгән.

Кәримоф өлгәндә дөләт хәвпсизлик идарисиниң башлиқи инайәтоф шавкәт мирзийойефниң әң күчлүк риқабәтчиси сүпитидә униң билән президентлиқни талашқан. Һалбуки, шавкәт мирзийойеф мувәққәт президентлиқ салаһийити билән рәқиблирини бир-бирләп йеңип, 2016-йили 9-айда өзбекистанниң йеңи президенти болған. Шундин кейин у кәримоф җәмәти билән кәримоф дәвридә дөләтниң муһим орунлириға қоюлған юқири дәриҗилик әмәлдарларни һоқуқтин чәтләштүргән вә өзиниң йеқинлирини бир-бирләп өстүргән.

Мирзайеф тәхткә чиққандин буян өзбекистанниң кәримоф дәвридики һакиммутләқ сиясий атмосферасида аста-аста яхшилиниш көрүлгән. Иқтисадни җанландуруш, хәлқ турмушини яхшилаш, динға болған чәклимиләрни бошитиш, сиясий мәһбусларни азад қилиш, чәтәлләр, болупму қошна әлләр билән болған мунасивәтни юмшитиш қатарлиқ җәһәтләрдә көрүнәрлик өзгиришләр йүз беришкә башлиған. Һалбуки, хәлқарадики көзәткүчиләр, гәрчә шавкәт мирзийойеф өзбекистанда ислаһатни йолға қоюватқан болсиму, әмма униң бу дөләттики мутләқ алий рәһбәргә айлинип, сиясий рәқиблирини бир-бирләп тазилиши өзбекистанниң демократийилишишигә техи узун бир җәрянниң барлиқидин шәпә бәрмәктә, дәп қаримақта.

Пикирләр (0)
Share
Толуқ бәт