Shawket mirziyoyéf özbékistanning mutleq aliy rehbiri bolalamdu

Muxbirimiz qutlan
2018-02-17
Élxet
Pikir
Share
Print

Özbékistanning islam kerimoftin kéyinki yéngi prézidénti shawket mirziyoyéf hakimiyet béshigha chiqqinigha bir yildin ashqanda, xelq'ara taratqular uning ottura asiyadiki bu döletning mutleq aliy rehbirige aylan'ghanliqini ilgiri sürmekte.

"Azadliq radiyosi" özbék bölümining torida yéqinda "Shawket mirziyoyéf qandaq qilip özbékistanning mutleq aliy rehbirige aylandi" serlewhilik bir uzun xewer analizi élan qilin'ghan.

Xewerde körsitilishiche, bu yil 31-yanwar küni prézidént shawket mirziyoyéf axiri kerimof dewridin qep qalghan eng axirqi mustehkem qozuq - özbékistan dölet xewpsizlik idarisining bashliqi rustem inayetofni ghulatqan. Buning bilen u prézidéntliq textige chiqqandin buyan özige kélidighan eng chong tehditni tügitip, özining mutleq aliy rehberlik hoquqini mustehkemligen.

Melumki, özbékistan musteqil bolghan 25 yil jeryanida "Özbékistan" dégen söz bilen "Prézidént kerimof" dégen söz goya menidash sözdek qollinilghan. Shawket mirziyoyéf gerche kerimof dewride özbékistan hökümitining bash ministirliq wezipisini atquzghan bolsimu, emma umu bu dölettiki bashqa barliq emeldarlargha oxshashla kerimofning "Kölenggisi" bolup kelgen.

Kerimof ölgende dölet xewpsizlik idarisining bashliqi inayetof shawket mirziyoyéfning eng küchlük riqabetchisi süpitide uning bilen prézidéntliqni talashqan. Halbuki, shawket mirziyoyéf muweqqet prézidéntliq salahiyiti bilen reqiblirini bir-birlep yéngip, 2016-yili 9-ayda özbékistanning yéngi prézidénti bolghan. Shundin kéyin u kerimof jemeti bilen kerimof dewride döletning muhim orunlirigha qoyulghan yuqiri derijilik emeldarlarni hoquqtin chetleshtürgen we özining yéqinlirini bir-birlep östürgen.

Mirzayéf textke chiqqandin buyan özbékistanning kerimof dewridiki hakimmutleq siyasiy atmosférasida asta-asta yaxshilinish körülgen. Iqtisadni janlandurush, xelq turmushini yaxshilash, din'gha bolghan cheklimilerni boshitish, siyasiy mehbuslarni azad qilish, chet'eller, bolupmu qoshna eller bilen bolghan munasiwetni yumshitish qatarliq jehetlerde körünerlik özgirishler yüz bérishke bashlighan. Halbuki, xelq'aradiki közetküchiler, gerche shawket mirziyoyéf özbékistanda islahatni yolgha qoyuwatqan bolsimu, emma uning bu dölettiki mutleq aliy rehberge aylinip, siyasiy reqiblirini bir-birlep tazilishi özbékistanning démokratiyilishishige téxi uzun bir jeryanning barliqidin shepe bermekte, dep qarimaqta.

Toluq bet