Ши җинпиң берминиң етник хитай қораллиқ гуруһи билән болған сөһбитини қоллашқа вәдә қилған

Мухбиримиз әркин
2016-08-19
Елхәт
Пикир
Share
Принт

Бирма дөләт комиссари аңсән сучи җүмә күни бейҗиңда хитай рәиси ши җинпиң билән сөһбәт өткүзгән. Фирансийә агентлиқиниң хәвәр қилишичә, ши җинпиң аңсән сучиға бирма һөкүмитиниң хитай-бирма чеграсидики етник хитайларниң қораллиқ гуруһи билән болған тинчлиқ сөһбитини қоллайдиғанлиқини билдүргән.

У «хитай бирма билән болған мунасивәтниң тәрәққиятиға зор әһмийәт бериду» дәп көрситип, берминиң «тинчлиқ сөһбитини алға сүрүштә иҗабий рол ойнаш» қа вәдә бәргән. Бирма һөкүмити йеқинда етник хитайниң қораллиқ гуруһи билән сөһбәт өткүзиду.

Бейҗиң һөкүмити берминиң хитай пули ишлитидиған, хитай тилини рәсмий һөкүмәт тили қилип қоллинидиған, йүннәнгә йеқин чеграсидики бу етник хитай қораллиқ гуруһни қоллап кәлгән.

Аңсән сучи дәл тинчлиқ сөһбити һарписида хитайни зиярәт қилди. Бу униң бирма демократийә иттипақи сайламда ғәлибә қилип, һакимийәт сорашқа башлиғандин буян елип барған тунҗи чәтәл зиярити иди.

Фирансийә агентлиқиниң илгири сүрүшичә, аңсән сучиниң күнтәртипидики йәнә бир муһим мәсилә, мекоң дәряси тосма қурулуши икән. Хитай 3 милярд 600 милйон доллар дәсми салидиған бу қурулуш бирма хәлқиниң қаршилиқиға учрап, 2011‏-йили тохтитип қоюлған. У, түнүгүн хитай баш министири ли кечяң билән көрүшкәндә тосма қурулушини музакирә қилған иди.

Пикирләр (0)
Share
Толуқ бәт