Хитай рәиси ши җинпиң ахбаратчиларни компартийәниң тәшвиқатчиси болушқа үндигән

Мухбиримиз ирадә
2017-11-09
Елхәт
Пикир
Share
Принт

Хәлқ ториниң хәвиридин қариғанда, 8-ноябир күни хитайда «ахбаратчилар байрими» тәбрикләнгән болуп, хитай рәиси ши җинпиң бу мунасивәт билән ахбаратчиларға тәбрик хети әвәткән. У тәбрик хетидә «барлиқ ахбаратчилар улуғ дәвр яңратқан алға илгириләш зәпәр маршиға җөр болуши вә уни тәшвиқ қижишқа тәйяр туруши керәк,» дегән.

Қизиқарлиқи шуки, мәзкур «ахбаратчилар байрими» ахбарат-учур әркинлики қаттиқ қамал қилиниватқан уйғур елидиму дағдуға билән күтүвелинған. Бу һәқтә ечилған йиғинда уйғур аптоном районлуқ партком даимий комитетиниң әзаси, тәшвиқат бөлүминиң башлиқи тйән вен сөз қилип, «ахбарат хизмәтчилири сиясий тонушини күчәйтиши, партийәниң ахбарат хизмитигә садиқ болуп, партийәниң җамаәт пикри хизмити мәсулийитини вә бурчини зиммисигә елиши керәк,» дегән. У йәнә ахбарат хадимлирини очуқ-ашкара һалда партийәниң тәшвиқатчиси болушқа чақирип, «ахбаратчилар партийәниң сиясәт, тәшәббуслириниң тарқатқучиси, дәвр роһиниң хатирилигүчиси болуши керәк,» дегән.

Хитай, хәлқара кишилик һоқуқ органлириниң доклатлирида ахбарат әркинлики әң еғир дәпсәндә қилиниватқан дөләт, дәп қарилип кәлмәктә. Мәлум болушичә, болупму ши җинпиң тәхткә чиққан 5 йил мабәйнидә бу саһәдики чекиниш интайин зор болған.

Чәтәлләрдики көзәткүчиләр, ши җинпиң һакимийитиниң һазир барлиқ ахбарат васитилирини қаттиқ контрол қилип, уларни пәқәт коммунистик партийәниң вә өзиниң тәшвиқатини қилидиған васитигә айландуруватқанлиқини билдүрүмәктә һәмдә «хитайниң нөвәттики сиясий атмосфераси мәдәнийәт инқилаби мәзгилидин пәрқсиз болмақта,» дәп көрсәтмәктә.

Пикирләр (0)
Share
Толуқ бәт