CNN: «Шималий корейә мәсилиси һәл болса, америка хитай билән техиму әркин риқабәтлишәләйду»

Мухбиримиз әркин
2018-06-08
Елхәт
Пикир
Share
Принт

Америка президенти трамп билән шималий корейә рәһбири ким җуңунниң 12‏-июн күни сингапорда учришидиғанлиқи муқимлашти.

Әгәр учришиш мувәппәқийәтлик әмәлгә ашса, бу икки дөләт рәһбириниң тунҗи қетим йүзтуранә көришиши болиду. Көзәткүчиләр учришишта икки тәрәп келишим һасил қилип, икки дөләт мунасивәтлиридә бурулуш йүз бәрсә, буниңға хитайниң қандақ инкас қайтуридиғанлиқиға диққәт қилмақта.

Америка симлиқ хәвәрләр тори - CNN ниң җүмә күни елан қилған бу һәқтики бир анализида, хитайниң учришишниң әмәлий нәтиҗигә еришишини халимайдиғанлиқи билдүрүлгән.

Анализда қәйт қилинишичә, чүнки корейә йерим арилида муқимлиқ әмәлгә ашса, бу америкиниң һазирқи хитай билән болған истиратегийәлик риқабитини техиму әркин елип беришиға имкан яритип беридикән.

Илгири шималий корейәниң ядро қораллар пилани америкини бәнт қилип, уни изчил хитайниң һәмкарлиқиға муһтаҗ қилип кәлгән иди.

CNN Анализида мутәхәссисләр корейә арилидики җиддилик пәсәйсә, җәнубий корейәдә турушлуқ америка қисимлириниң пут-қоли бошайдиғанлиқи, уларни асия-тинч окяндики башқа җайларға йөткәш имканийити туғулидиғанлиқини билдүргән.

Анализда баян қилинишичә, хитай доналд трамп билән ким җуңунниң учришишиниң пәқәт корейә йерим арилидики вәзийәтни йүмшитишини, лекин униң қолға чиққудәк нәтиҗигә еришишини халимайдикән.

Анализда, америкиниң шималий корейә мәсилисигә бағлинип қелиши хитайға нурғун пурсәт яритип беридиғанлиқи билдүрулгән.

Анализда қәйт қилинишичә, бу униң җәнубий деңиздики орнини мустәһкәмләп, тәйвәнгә дипломатик, һәрбий бесимни күчәйтиши, японийәниң шәрқий деңиздики араллириға паракләндичилик селиши, армийәсини заманивилаштуруши вә асия -тинч окян районидики дөләтләр билән иқтисади мунасивитини чоңқурлаштурушиға пурсәт яритип беридикән.

Призидент трамп билән ким җуңун америка билән хитайниң җәнубий деңиздики ихтилапи күчиийип кәткән мәзгилдә учришиду. Йеқинда америка дөләт мудапиә министири җим маттис, хитайниң җәнубий деңизға қорал-ярақ орунлаштурғанлиқини тәнқидләп, бу қоралларниң башқиларни «қорқутуш вә зорлаш» ни мәқсәд қилғанлиқини тәкитлигән һәм буниңға қарши «үнүмлик тәдбирләр» ни алидиғанлиқини билдүргән иди.

Пикирләр (0)
Share
Толуқ бәт