CNN: "Shimaliy koréye mesilisi hel bolsa, amérika xitay bilen téximu erkin riqabetlisheleydu"

Muxbirimiz erkin
2018-06-08
Élxet
Pikir
Share
Print

Amérika prézidénti tramp bilen shimaliy koréye rehbiri kim jungunning 12‏-iyun küni sin'gaporda uchrishidighanliqi muqimlashti.

Eger uchrishish muweppeqiyetlik emelge ashsa, bu ikki dölet rehbirining tunji qétim yüzturane körishishi bolidu. Közetküchiler uchrishishta ikki terep kélishim hasil qilip, ikki dölet munasiwetliride burulush yüz berse, buninggha xitayning qandaq inkas qayturidighanliqigha diqqet qilmaqta.

Amérika simliq xewerler tori - CNN ning jüme küni élan qilghan bu heqtiki bir analizida, xitayning uchrishishning emeliy netijige érishishini xalimaydighanliqi bildürülgen.

Analizda qeyt qilinishiche, chünki koréye yérim arilida muqimliq emelge ashsa, bu amérikining hazirqi xitay bilen bolghan istiratégiyelik riqabitini téximu erkin élip bérishigha imkan yaritip béridiken.

Ilgiri shimaliy koréyening yadro qorallar pilani amérikini bent qilip, uni izchil xitayning hemkarliqigha muhtaj qilip kelgen idi.

CNN Analizida mutexessisler koréye arilidiki jiddilik peseyse, jenubiy koréyede turushluq amérika qisimlirining put-qoli boshaydighanliqi, ularni asiya-tinch okyandiki bashqa jaylargha yötkesh imkaniyiti tughulidighanliqini bildürgen.

Analizda bayan qilinishiche, xitay donald tramp bilen kim jung'unning uchrishishining peqet koréye yérim arilidiki weziyetni yümshitishini, lékin uning qolgha chiqqudek netijige érishishini xalimaydiken.

Analizda, amérikining shimaliy koréye mesilisige baghlinip qélishi xitaygha nurghun purset yaritip béridighanliqi bildürulgen.

Analizda qeyt qilinishiche, bu uning jenubiy déngizdiki ornini mustehkemlep, teywen'ge diplomatik, herbiy bésimni kücheytishi, yaponiyening sherqiy déngizdiki arallirigha paraklendichilik sélishi, armiyesini zamaniwilashturushi we asiya -tinch okyan rayonidiki döletler bilen iqtisadi munasiwitini chongqurlashturushigha purset yaritip béridiken.

Prizidént tramp bilen kim jungun amérika bilen xitayning jenubiy déngizdiki ixtilapi küchi'iyip ketken mezgilde uchrishidu. Yéqinda amérika dölet mudapi'e ministiri jim mattis, xitayning jenubiy déngizgha qoral-yaraq orunlashturghanliqini tenqidlep, bu qorallarning bashqilarni "Qorqutush we zorlash" ni meqsed qilghanliqini tekitligen hem buninggha qarshi "Ünümlik tedbirler" ni alidighanliqini bildürgen idi.

Toluq bet