Хитай өлкилиридики «шинҗаң синиплири» техиму көп оқуғучи қобул қилишқа тәйярланмақта

Мухбиримиз ирадә
2013-08-28
Елхәт
Пикир
Share
Принт

Бу йил хитай өлкилиридики шинҗаң толуқ оттура синиплири вә шинҗаң оттура техником синиплириға җәмий 12 миң 422 нәпәр йеңи оқуғучи қобул қилинған. Бу йеңи оқуғучилар 23-авғуст күнидин башлап, үрүмчи вә санҗи шәһәрлиригә йиғилип тизимға алдурғандин кейин, икки күнлүк тәрбийиләш курсиға қатнаштурулған.

Хитай даирилири йеқинда хитай өлкилиридики шинҗаң толуқ оттура синиплириға қобул қилинидиған оқуғучилар саниниң көпәйтилидиғанлиқини елан қилған иди. Тәңритағ ториниң хәвиридин мәлум болушичә, мәзкур пиланға асасән, бу йил шәндуң җиниң шәһиридә йәнә бир шинҗаң толуқ оттура синипи тәсис қилинип, шинҗаң толуқ оттура синиплири тәсис қилинған шәһәрләрниң сани 45 гә йәткүзүлгән.

Хитай даирилири 2000-йилидин етибарән уйғур елигә ихтисаслиқларни тәрбийиләп бериш нами астида қурған шинҗаң синиплири уйғур зиялийлириниң әндишисини қозғап кәлгән иди. Улар уйғур елидики маарипқа мәбләғ селиш вә оқу-оқутуш шараитлирини яхшилаш арқилиқму ихтисаслиқларни йетиштүрүш мәқситигә техиму асан йәткили болидиғанлиқини, хитай һөкүмитиниң бу йәрдики әсли мәқситиниң уйғурларниң миллий кимликини аҗизлаштуруш икәнликини билдүрмәктә.

Игилинишичә, бу йил шинҗаң толуқ оттура синиплириға қобул қилинған йеңи оқуғучиларниң сани 9122 нәпәргә, хитай өлкилиридики толуқ оттура синипларда оқуватқан омумий оқуғучи сани болса 31 миңға йәткән болуп, һазирғичә бу шинҗаң толуқ оттура синиплирида оқуған омумий оқуғучи сани 60 миң 400 нәпәргә йәтти.

Пикирләр (0)
Share
Толуқ бәт