Radi'omiz muxbiri shöhret hoshurning tutqundiki ikki qérindishi qamaqtin qoyup bérildi

Muxbirimiz méhriban
2015-12-31
Élxet
Pikir
Share
Print

Radi'omiz muxbiri shöhret hoshurning 16 aydin béri xitay bixeterlik da'irilirining qolida tutup turuwatqan ikki qérindishi qoyup bérildi.

Shöhret hoshurning bir qérindishi 2014 ‏-yili 6 ‏-ayda dölet bixeterlikige xewp yetküzüsh bilen eyiblinip 5 yilliq késilgen we uning sotlinish jeryanini shöhret hoshurgha yetküzgen qalghan ikki qérindishi bultur 8 ‏-ayning 17 ‏-küni dölet mexpiyetlikini ashkarilash bilen tutqun qilin'ghan idi.

Shöhret hoshurning ürümchi dölet bixeterlik qamaqxanisida tutup turuluwatqan bu ikki qérindishi tünügün yeni 30 ‏-dékabir küni seherde qoyup bérilgen, ularning qoyup bérilishi sewebi hazirche melum emes.

Shöhret hoshurning qérindashliri tutqun qilin'ghandin kéyin buni amérika metbu'atliri " Bir döletning bir muxbirdin öch élish herikiti" dep xewer qilghan, amérika tashqi ishlar ministirimu bu heqte ikki qétim bayanat élan qilip xitay terepni shöhret hoshurning a'ile-tawabi'atlirigha dexli -terz yetküzmeslikke chaqirghan idi.

Melum bolushiche 16 ay 13 kün dawam qilghan bu tutup turulush dawamida amérika tashqi ishlar ministirliki xitayning washin'gton elchixanisi we béyjingdiki tashqi ishlar da'iriliri bilen uchrishishlirida shöhret hoshurning qérindashlirining heqsiz halda tutqun qilish mesilisini izchil halda otturigha qoyup kelgen. Netijide ular heqqide échilmaqchi bolghan sot bir qétim kéchiktürülgen, bir qétim neq shu künlükte emeldin qaldurulghan we 3 ‏- qétimda sot échilip "Dölet mexpiyetlikini ashkarilash jinayiti" bilen eyiblen'gen bolsimu emma höküm chiqirilmighan idi.

Shöhret hoshur radi'ogha ishqa chüshkendin buyan, bolupmu, Uyghur rayondiki qarshiliq heriketlirini merkezlik halda xewer qilishqa bashlighandin buyan, xitay terep uni deslepte radi'odin chiqish kétish, arqidin bolsa Uyghur rayonidin ehwal igilimeslik heqqide agahlandurup we herxil yollar bilen tehdit sélip kelgen. Shöhret hoshur bu tehditlerge perwa qilmay xizmitini dawamlashturghan we bu yil ichide xelq'arada chong ghulghula peyda qilghan 18- ‏séntebir bay kömürkan hujumi weqesinimu tunji bolup shöhret hoshur dunyagha ashkarilighan idi.

Toluq bet