Шөһрәт закирниң хотән вилайитидики зиярити диққәт қозғиди

Мухбиримиз ирадә
2019-03-28
Елхәт
Пикир
Share
Принт

Уйғур аптоном райониниң рәиси шөһрәт закир йеқинда хотән вилайитидә зиярәттә болған. Униң бу зияритиниң хәлқарада хитайниң уйғур елидики лагерлириға қаритилған тәнқид қаттиқ күчәйгән бир мәзгилгә тоғра келиши диққәт қозғиди.

«Шинҗаң гезити» ниң бу һәқтики хәвиридә ейтилишичә, 25-марттин 27-мартқичә хотән вилайитидә зиярәттә болған шөһрәт закир у йәрдә «җәмийәт муқимлиқи вә мәңгүлүк әминликни яритиш баш нишани» дин қәтий тәврәнмәсликни тәкитлигән.

Униң бу зияритидә тәкитләнгән йәнә бир муһим нуқта болса «намратлиқтин қутулдуруш» мәсилиси болған. Хәвәрдә униң нийә наһийәси, қарақаш вә чира наһийәлиридә өйму-өй кирип деһқанларни зиярәт қилип, уларниң кирим әһвалини игилигәнлики вә сөһбәттә болғанлиқи баян қилинған.

Хотән вилайити хитай һөкүмитиниң 2017-йилидин башлап йолға қойған лагер түзүминиң әң еғир зәрбисигә учриған вилайәтләрниң биридур. Хотәнниң өзидила лагерға кирип кәткән адәм саниниң нәччә йүз миңға йетидиғанлиқи мөлчәрләнмәктә.

Чәтәлләрдики уйғур көзәткүчиләр бундақ бир пәйттә шөһрәт закирниң хотәнни зиярәт қилишини тасадипийлиқ әмәс, дәп қаримақта.

Уларниң пәрәз қилишичә, нөвәттә хәлқарада б д т вә һәрқайсий дөләтләр һөкүмәтлириниң уйғур елидики лагерларға қарита мустәқил һалда халиған орунда тәкшүрүш елип бериш һәққидики тәләплири қаттиқ күчәймәктикән. Мушундақ болғуси зиярәтләр алдида хитай һөкүмити шөһрәт закирни хотәнгә әвәтиш арқилиқ лагер сиртидики уйғурларниң кәң көләмлик наразилиқини пәсәйтиш, уларни иқтисадий ярдәмләр арқилиқ мәликә қилишни мәқсәт қиливатқан болуши мумкин икән.

Пикирләр (0)
Share
Толуқ бәт