Уйғур елидә «ши җинпиңниң муһим сөзини өгиниш» темисидики йеңи бир нөвәтлик сиясий долқун көтүрүлгән

Мухбиримиз ирадә
2019-11-05
Елхәт
Пикир
Share
Принт

Уйғур аптоном районида «ши җинпиңниң муһим сөзини өгиниш, изчиллаштуруш» темисидики йеңи бир нөвәтлик сиясий долқун көтүрүлүватқанлиқи мәлум болмақта.

Тәңритағ тори қатарлиқ һөкүмәт таратқулирида тарқитилған хәвәрләрдин қариғанда, 4-ноябир күни уйғур аптоном районлуқ сиясий кеңәш мәхсус «партийә 19-нөвәтлик мәркизий комитети 4-омумий йиғини» ниң роһини өгиниш йиғини ачқан болуп, хәвәрдин қариғанда йиғинда йәнә «җуңго коммунистик партийәси вә җуңгочә сотсиялизмни сиясий җәһәттә қәлбтин етирап қилиш, идийә җәһәттә қәлбтин етирап қилиш, нәзәрийә җәһәттә қәлбтин етирап қилиш, һессият җәһәттә қәлбтин етирап қилишни үзлүксиз күчәйтип, җуңгочә сотсиялизмниң сиясий тәрәққият йолида қәтий тәврәнмәй меңиш керәк» дегәнләр тәләп қилинған.

Хитай һөкүмити нөвәттә уйғур елидә йолға қоюватқан еғир кишилик һоқуқ дәпсәндичилики, лагер түзүми вә шундақла хоңкоңдики намайишчиларға қаратқан зорлуқ-зомбулуқи сәвәблик хәлқарада күчлүк тәнқидләргә учримақта. Йеқиндин буян америка һөкүмитиму ши җинпиң һакимийитигә қаратқан тәнқидлирини қаттиқ күчәйтип, хитайни тизгинләшни дуняниң бихәтәрлики үчүн зөрүр, дәп көрсәткәниди. Дәл мушундақ бир пәйттә хитай һөкүмитиниң 4-омумий йиғин вә униң роһини йәткүзүш йиғинлирини чақирип, һәдәп партийә билән идийәдә вә пикирдә бирдәкликни сақлашни тәкитлиши диққәт қозғайдикән.

Мәлум болушичә, юқиридикидәк «партийә 4-омумий йиғининиң роһини йәткүзүш, ши җинпиң сөзиниң роһини өгиниш» йиғинлири хитай хәлқ армийәсиниң уйғур елидә турушлуқ қисимлирида вә шундақла һәрқайси вилайәт-наһийәләрдә айрим-айрим омумлаштурулған. Бу һәқтики хәвәрләрдә «-4омумий йиғининиң роһи шинҗаңда турушлуқ азадлиқ армийә вә қораллиқ сақчи қисимдики офитсер-әскәрләр арисида қизғин инкас қозғиди. Кәң офитсер-әскәрләр бәс-бәстә түзүм ишәнчини чиңитип, садиқлиқ билән чеграни муһапизәт қилиш. . . Һәққидә қәсәм бәрди» дейилгән. Ақсу ахбарат торида бу һәқтә тарқитилған хәвәрдә болса «ши җинпиңниң йеңи дәвр җуңгочә сотсиялизм идийәси, йеңи дәврдики шинҗаңниң партийәни идарә қилиш тәдбирини чоңқур өгинип, қизил генни ‹қан томур' ға сиңдүрүш керәк» дегән шоар оттуриға қоюлған.

Пикирләр (0)
Share
Толуқ бәт