Әркинлик сарийи хәлқара җамаәтни чағанни хитай түрмилиридә өткүзүватқан сиясий мәһбусларни унтуп қалмаслиққа чақирди

Мухбиримиз ирадә
2016-02-05
Елхәт
Пикир
Share
Принт

Хәлқаралиқ кишилик һоқуқ оргини болған «әркинлик сарийи» 5-феврал «хитайниң чағинида сиясий мәһбусларниң аилә тавабиатлири көләңгә астида» намлиқ бир баянат елан қилип, хәлқара җамаәтни чағанни хитай түрмилиридә өткүзүватқан сиясий мәһбусларни унтуп қалмаслиққа чақирди.

Униңда8-феврал күни башлинидиған чаған байримида милйонлиған хитай пуқралириниң аилә тавабиатлири билән җәм болуп байрам өткүзидиғанлиқи, әмма түрмидә йетиватқан шундақла йеқинқи бир қанчә һәптидин буян қолға елинған сиясий мәһбуслар вә уларниң аилә тавабиатлириниң болса бундақ бир пурсәттин мәһрум икәнлики баян қилинди. Улар бу сиясий мәһбусларниң пәқәтла пәрқлиқ сиясий вә диний көз қарашлири түпәйлидинла «җинайәтчи» дәп қарилинип, аилисидин, сөйгәнлиридин узақ қелишқа мәҗбур болуватқанлиқини билдүрди.

Әркинлик сарийи тивиттир тори арқилиқ йәнә, түрмидики сиясий мәһбуслар вә уларниң аилилиригә байрамлиқ салам йоллаш паалийити башлатқан болуп, униңда хитай өктичи, нобел мукапати саһиби лю шавбо, уйғур зиялийси илһам тохти, шундақла техи йеқинда уйғур елидики сот даирилири тәрипидин «дөләт һакимийитини ағдурушқа урунуш» җинайити билән әйиблинип, 19 йиллиқ қамақ җазасиға һөкүм қилинған хитай паалийәтчиси җаң хәйтав қатарлиқ сиясий мәһбусларниң исми йәр алған.

Әркинлик сарийи баяннамисидә, хитайдики вә дунядики барлиқ кишилик һоқуқ тәрәпдарлирини чаған мәзгилидә бу сиясий мәһбусларни унтуп қалмаслиққа, уларниң аилә-тавабиатлиридин һал сорап, уларға роһий җәһәттин мәдәт болушқа чақирған.

Пикирләр (0)
Share
Толуқ бәт