Водров вилсон мәркизи җаң җиҗоңниң совет рәһбәрликигә язған хетини елан қилди

Мухбиримиз үмидвар
2017-02-26
Елхәт
Пикир
Share
Принт

Америкидики водород вилсон мәркизи өзиниң соғуқ мунасивәтләр уруши дәвригә аит архип амбириға үрүмчидики бирләшмә һөкүмәтниң рәиси болған генерал җаң җиҗоңниң 1947-йили, 7-июл күнидики совет иттипақиниң үрүмчидики баш консули савелевқа язған, әмәлийәттә у арқилиқ совет иттипақи али рәһбәрлириниң көрүшигә йоллиған мәктупиниң русчә нусхиси вә инглизчә тәрҗимисини киргүзди.

Мәзкур мәктуп, әхмәтҗан қасими қатарлиқлар вәкилликидики или тәрәп билән җаң җиҗоң башчилиқидики нәнҗиң гоминдаң һөкүмити арисида тинчлиқ битим имзалинип, бирләшмә һөкүмәт қурулуп бир йил тошқанда йезилған болуп, бу вақитта җаң кәйши бирләшмә һөкүмәтниң рәисилик орнини мәсуд сәбиригә тапшурғандин кейин, или тәрәп вәкиллириниң, җүмлидин совет иттипақи тәрәпниң қаттиқ қаршилиқиға учрап, зиддийәт өткүрләшкән иди.

Җаң җиҗоң хетидә әхмәтҗан қасими башчилиқидики или тәрәпни тинчлиқ битимни иҗра қилмаслиқ, битимгә хилаплиқ қилиш билән әйиблигән болуп, буниң пакитлири сүпитидә или,тарбағатай вә алтайни«алаһидә боливалди» дәп әйиблигән һәмдә совет иттипақидин чөчәккә қайтип кәлгән гоминдаң офитсерлиридин 30 нәччә адәмниң өлтүрүлүши, һөкүмәтниң гоминдаң пәрәс вәкили түркистанниң дөрбилҗиндә өлтүрүлүш вәқәси қатарлиқ бир қатар тәрәпләрни көрсәткән.

У хетидә йәнә совет иттипақиниң яраштуруши билән уруш тохтап, тинчлиқ битими имзаланғанлиқи, совет иттипақиниң хитайниң ички ишлириға арилашмаслиқ вәдиси бәргәнлики қатарлиқ тәрәпләрниму әслитип, совет иттипақидин или тәрәпни қайил қилишни тәләп қилған.

Җаң җиҗоңниң бу хети әмәлийәттә әхмәтҗан қасими, рәһимҗан сабир һаҗи қатарлиқлар вәкилликидики или тәрәп үстидин москваға қилинған шикайәттин ибарәт иди.

Җаң җиҗоңниң бу хети йезилип, бәш күндин кейин, или тәрәп вәкиллиридин бирләшмә һөкүмәт муавин рәиси әхмәтҗан қасими вә рәһимҗан сабир һаҗи бирликтә савелевқа мәктуп йоллап, җаң җиҗоң башлиқ гоминдаң һөкүмитиниң тинчлиқ битимини бузғанлиқи вә битимни иҗра қилмиғанлиқидин шикайәт қилған.

Баш консул савелев җаң җиҗоң вә әхмәтҗан қасимиларниң хәтлирини охшашла москваға елип берип юқири рәһбәрликкә тапшурған.

Пикирләр (0)
Share
Толуқ бәт