Wodrow wilson merkizi jang jijongning sowét rehberlikige yazghan xétini élan qildi

Muxbirimiz ümidwar
2017-02-26
Élxet
Pikir
Share
Print

Amérikidiki wodorod wilson merkizi özining soghuq munasiwetler urushi dewrige a'it arxip ambirigha ürümchidiki birleshme hökümetning re'isi bolghan général jang jijongning 1947-yili, 7-iyul künidiki sowét ittipaqining ürümchidiki bash konsuli sawéléwqa yazghan, emeliyette u arqiliq sowét ittipaqi ali rehberlirining körüshige yollighan mektupining rusche nusxisi we in'glizche terjimisini kirgüzdi.

Mezkur mektup, exmetjan qasimi qatarliqlar wekillikidiki ili terep bilen jang jijong bashchiliqidiki nenjing gomindang hökümiti arisida tinchliq bitim imzalinip, birleshme hökümet qurulup bir yil toshqanda yézilghan bolup, bu waqitta jang keyshi birleshme hökümetning re'isilik ornini mes'ud sebirige tapshurghandin kéyin, ili terep wekillirining, jümlidin sowét ittipaqi terepning qattiq qarshiliqigha uchrap, ziddiyet ötkürleshken idi.

Jang jijong xétide exmetjan qasimi bashchiliqidiki ili terepni tinchliq bitimni ijra qilmasliq, bitimge xilapliq qilish bilen eyibligen bolup, buning pakitliri süpitide ili,tarbaghatay we altayni"Alahide boliwaldi" dep eyibligen hemde sowét ittipaqidin chöchekke qaytip kelgen gomindang ofitsérliridin 30 nechche ademning öltürülüshi, hökümetning gomindang peres wekili türkistanning dörbiljinde öltürülüsh weqesi qatarliq bir qatar tereplerni körsetken.

U xétide yene sowét ittipaqining yarashturushi bilen urush toxtap, tinchliq bitimi imzalan'ghanliqi, sowét ittipaqining xitayning ichki ishlirigha arilashmasliq wedisi bergenliki qatarliq tereplernimu eslitip, sowét ittipaqidin ili terepni qayil qilishni telep qilghan.

Jang jijongning bu xéti emeliyette exmetjan qasimi, rehimjan sabir haji qatarliqlar wekillikidiki ili terep üstidin moskwagha qilin'ghan shikayettin ibaret idi.

Jang jijongning bu xéti yézilip, besh kündin kéyin, ili terep wekilliridin birleshme hökümet mu'awin re'isi exmetjan qasimi we rehimjan sabir haji birlikte sawéléwqa mektup yollap, jang jijong bashliq gomindang hökümitining tinchliq bitimini buzghanliqi we bitimni ijra qilmighanliqidin shikayet qilghan.

Bash konsul sawéléw jang jijong we exmetjan qasimilarning xetlirini oxshashla moskwagha élip bérip yuqiri rehberlikke tapshurghan.

Toluq bet