Ақсу мәбләғ чақириш үчүн су иншаатини күчәйтмәкчи

Мухбиримиз гүлчеһрә
2017-03-02
Елхәт
Пикир
Share
Принт

Җуңго ахбарат тори хәвиригә қариғанда, «җәнуби шинҗаң деһқанчилиқ сода йәрмәнкиси» ақсу шәһиридики көргәзмә мәркизидә 3-марттин 5-мартқичә ечилидиған болуп, көргәзминиң йеза игилик саһәлиригә техиму көп мәбләғ чақиришни мәқсәт қилидиғанлиқи көрситилгән.

Ақсу даирилири бу йил йеза игилик мәһсулатлирини сетип чиқириш йоллирини кеңәйтип, сода чоң базири вә район характерлик өзгичә йеза игилик мәһсулатлири ғол мәркизи қурушни илгири сүридикән. Вилайәтлик су ишлири идариси партгурупписиниң секретари ли шөҗүнниң сөзичә, пиланға мас һалда бу йил 3 милярд 900 милйон сомлуқ су иншаати қурулуши қилиш нишани чүшүрүлгән болуп, вилайәтниң су ишлириға мунасивәтлик чоң-чоң түрлирини тәстиқлап, түр турғузулушиға һәқиқий капаләтлик қилинидикән.

Һалбуки, ақсу вилайитидики чәклик су мәнбәси вә тәбиий муһитниң бузулуши изчил һалда һәр саһә кишилириниң диққитини қозғап кәлмәктә.

Анализчиларниң инкаслириға қариғанда, ақсуда үнүмдар йәрләр вә су мәнбәлириниң асасән биңтуән йеза игилик ишләпчиқириш мәйданлири һәмдә көчмән хитайлар тәрипидин игилиниши, баравәр болмиған сиясәтләр түпәйли уйғур деһқанлар қолидики йәрләрниң тартивелинип, судин қисилип, йәрлик милләтләр йеза игиликниң тәрәққиятидин мәнпәәтлинәлмәй келиватқан болуп, әксичә дөләтниң мәблиғи вә әвзәл сиясәтлири билән биңтуән мәйданлири пүтүнләй илғар үскүниләшкән, су мәнбәлирини игилигән. Улар асаслиқ мәнпәәт беридиған, иқтисадий үнүми юқири йеза игилик мәһсулатлирини ишләпчиқиришни пүтүнләй монопол қилған.

Лекин, биңтуәнниң пилансиз йәр ечиш, көчмән йөткәш түпәйли екологийигә бузғунчилиқ қилиш қилмишлириниң күчийип бериватқанлиқи көзәткүчиләр вә муһит мутәхәссислири тәрипидин оттуриға қоюлуп кәлмәктә.

Пикирләр (0)
Share
Толуқ бәт