Хитай инженерлири тибәттин уйғур елиға су башлап келишни синақ қилмақтикән

Мухбиримиз әркин
2017-10-30
Елхәт
Пикир
Share
Принт

Хитай инженерлири 1000 километирлиқ тонил қезип, тибәттин уйғур елиниң тәклимакан райониға су башлап келишни синақ қилмақтикән. Бәзи хитай инженерлири бу пиланниң синақ қилиниватқанлиқини хоңкоң «җәнубий хитай сәһәр почта гезити» гә ашкарилиған.

Мәзкур гезитниң йәкшәнбә күни хәвәр қилишичә, бу синаққа иштирак қиливатқан бир хитай гео-техника инженери, әгәр бу пилан ишқа ашса, у «шинҗаңни калифорнийәгә айландуриду» дегән.

Тибәттин тәклимаканға су башлаш пилани бу йеқинда оттуриға қоюлған әмәс. У буниңдин хели йиллар аввал бәзи хитай мутәхәссислири тәрипидин оттуриға қоюлған болсиму, бирақ бу пилан уйғур тәшкилатлири, муһит қоғдиғучилири вә һиндистан тәрәпниң наразилиқиға учриған.

Уйғур тәшкилатлири бу пилан тәклимакан әтрапидики бостанлиқларниң су мәсилисини һәл қилишқа ярдәм қилсиму, бирақ бу хитайниң бу районларға техиму көп көчмәнләрни орунлаштуруп, уйғурларниң турмуш, мәдәнийәт хаслиқиға техиму еғир бузғунчилиқ қилидиғанлиқини агаһландуруп кәлгән.

Хитай инженерлириниң билдүрүшичә, тибәт-тәклимакан су тонили қурулуши һазир хитайниң гуйҗу билән йүннән өлкиси арисида ясиливатқан су тонили қурулушиниң мувәппәқийәтлик болуш-болмаслиқиға бағлиқкән.

Бир хитай инженери бу қурулуш тибәт-тәклимакан су қанили үчүн техника, лайиһәләш методи вә әслиһә қатарлиқ җәһәтләрдә зөрүр тәҗрибә билән тәминләйдиғанлиқини билдүргән.
Бирақ, «җәнубий хитай сәһәр почта гезити» хәвиридә, бу пиланниң алдида зор тосқунлуқлар барлиқини, униң мәбләғ, қошна дөләтләрниң наразилиқи, лайиһәләш җәһәттики қийинчилиқ, муһитқа болған тәсири қатарлиқ хирисларға дуч келидиғанлиқини билдүргән.

Пикирләр (0)
Share
Толуқ бәт