Uyghur élidiki bir shirketning balilar süt parashukida mesile barliqi ashkarilan'ghan

Muxbirimiz erkin
2017-12-01
Élxet
Pikir
Share
Print

Uyghur aptonom rayonidiki "Shimu süt mehsulatliri cheklik hessidarliq shirkiti" ning balilar süt parashukida waqti ötken xam maddilarni arilashturghanliqi bayqalghan.

Teywen axbarat wasitilirining xewer qilishiche, xitay döletlik dora we yémeklik tekshürüsh idarisi yéqinda tekshürüsh élip bérip, mezkur shirketning balilar süt parashukigha qoshulidighan witamin qatarliq xam maddilarning waqti ötüp ketkenlikini bayqighan. Xewerde, bu xil balilar süt parashukidin 18ming quta bayqalghanliqini bildürgen.

Xewerde qeyt qilishiche, hemmidin diqqet qozghaydighan yéri xitay döletlik dora-yémeklikler tekshürüsh idarisi téxi yéqindila mezkur shirket ishlepchiqarghan 3 xil balilar süt parashukini testiqlighan iken. Xewerde, da'irilerning bu yil 12‏-noyabir bu shirket ishlepchiqarghan "Shiyö", "Yin'ey", "Mingshing" qatarliq 3 xil mehsulatni testiqlighanliqi, bu mehsulatlargha istémal waqti 2018‏-yili 4‏- ayda toshidu, dep yézilghanliqini bildürgen. Lékin da'iriler mezkur shirketning qanchilik süt parashukigha waqti ötken madda qoshulghanliqini ashkarilimighan. Xewerde buning 18 ming quta süt parashuki bilen cheklinidighanliqi yaki téximu köp süt mehsulatlirigha chétilidighanliqi melum emes, déyilgen.

Xewerde qeyt qilishiche, da'iriler tekshürüsh arqiliq "Yiyö" balilar süt parashukigha qoshulidighan ozuqluq kücheytish maddisining waqti 3 ay ötüp kétipla qalmay, nöldin töwen 10 gradus tépératurida saqlinidighan bu maddining da'im issiq yerde saqlan'ghanliqini bayqighan. Xewerde yene "Shimu süt mehsulatliri cheklik hedssidarliq shirkiti" ning bashqa xam eshyalarni teyyarlash, saqlash usulining qa'idige xilap ikenliki bildürülgen.

Toluq bet