Xitay saqchiliri aqsuda bir oqutquchini étiwétip weqeni "Tasadipiy qaza" dep békitken

Muxbirimiz jüme
2015-07-22
Élxet
Pikir
Share
Print


Ötken yili xitay saqchiliri aqsuda bir xitay oqutquchini étiwétip uninggha "Tasadipiy qaza" dep éniqlima bergen, buningdin narazi bolghan ölgüchining a'ile - tawabi'atliri adalet telep qilip erz qilishni bashlighan.

Weqede qaza qilghuchi aqsu kespiy téxnika instituti sen'et fakultét oqutquchisi li wenjyé bolup, u ötken yili 8 - iyul aqsu awatta ötküzülgen bir pi'anino musabiqisini tügitip, 8 yashliq qizi bilen aqsu shehirige qaytishida awat saqchiliri teripidin étip öltürülgen.

Li wénjyéning érining radiyomizgha bildürüshiche, u awat saqchiliri qurghan tekshürüsh ponkitigha kelgende toxtimay ötüp ketken iken.

Oq arqa orunduqta olturghan qizning mengzini qirip ötüp, ayalining arqa méngisige tegken we uning jénini alghan.

Halbuki, xitay qanun saqchiliri weqeni "Miltiq tasadipiy étilip kétip, adem öltürüsh hadisisi keltürüp chiqarghan", "Xizmet üstide ölüp kétish hadisisi" dep békitken.

Ölgüchining éri jang jénxey bir yildin buyan her derijilik hökümet organlirigha bérip dewa qilghan bolsimu netije qazinalmighan.

U radiyomizgha qilghan sözide, aqsuning térrorluqqa qarshi turush keypiyatining intayin yuqiri ikenlikini, yerlik hökümetning "Mingni xata öltürsek olturimizki, birnimu qachuruwetmeymiz" deydighan zéhniyet bilen siyaset yürgüzüwatqanliqidin shikayet qilghan.

Xitay saqchiliri ötken yili aprélda kelpindiki bir qizil chiraghdin motosiklitliq ötüp ketken abdulbasitni arqisidin qoghlap bérip étiwetken. Kéyin uning a'ile - tawabi'atliri naraziliq bildürüp namayish qilghanda ularning hemmisini tutup ketken we éghzini yumush heqqide tehdit salghan idi.

Toluq bet