Тайландта тутуп турулуватқан 17 нәпәр уйғурниң соти ечилди

Мухбиримиз меһрибан
2015-03-24
Елхәт
Пикир
Share
Принт

24-Март күни тайланд соти тайланд түрмисидә тутуп турулуватқан 17 уйғур үстидин сот ачқан. Мәлум болушичә, бу қетим сот ечиливатқан 17 нәпәр уйғур бултур сентәбир ейида тайланд чеграсидин қанунсиз киргән дәп әйиблинип тайланд сақчилири тәрипидин тутқун қилинған уйғурлар ичидики бир аилә кишилири икән. Уларниң арисида қорамиға йәтмигән балилар 13 нәпәр болуп, 2 бала тайланд түрмисидә туғулған.

Хәвәрләрдин мәлум болушичә, сәйшәнбә күнидики сотқа түркийә вә вә хитай әлчиханисиниң дипломатийә хадимлириму қатнашқан. Түркийә әлчихана хадими бу уйғурларниң қолида түркийә паспорти барлиқини ейтип, уларни түркийәгә қайтурушни тәләп қилған. Сотниң нәтиҗиси 27-март йәни җүмә күни чиқидиған болуп, түркийәниң анатолийә хәвәр агентлиқиниң хәвиридә «әгәр бу уйғурлар өзлириниң түркийәгә кетишни халайдиғанлиқини билдүрсә, тайланд һөкүмитиниң уларни түркийәгә қайтуруп бериш еһтимали күчлүк» дегән баянлар берилди.

Мәлуматларға асасланғанда, 2014-йили сентәбирдә тутулған йүзләрчә киши һазирғичә тайланд түрмилиридә йетиватқан болуп, хитай һөкүмити бу уйғурларни хитайға қайтуруп беришни тәләп қиливатқан болсиму, әмма бу уйғурлар өзлириниң түркийә пуқраси икәнликидә чиң турған. Хитай ташқи ишлар министирлиқиниң баянатчиси хуа чүнйиң 24-март күни ройтерс агентлиқиниң мухбириға, әһвалниң тәпсилатидин хәвәрсиз икәнликини ейтқан. У: «хитай қанунсиз көчмәнликкә қарши тайланд вә түркийә билән һәмкарлишишни халайду» дегән.

Пикирләр (0)
Share
Толуқ бәт