Qeshqerning toqquzaq, qaghiliq nahiyiliri qattiq yamghur we kelkün apitige uchridi

Muxbirimiz méhriban
2016-09-06
Élxet
Pikir
Share
Print

Xitayning junggo xewerler torida xewer qilinishiche, 5-séntebir qeshqer toqquzaq (konasheher), qaghiliq nahiyiliri tuyuqsiz yaqqan qara yamghur we yamghurdin kéyinki kelkün apitige uchrighan.

Xewerde, shu küni qaghiliq nahiyiside yaqqan qara yamghurning höl-yéghin miqdari 30 santimétirdin éship, yighiwélish aldidiki qonaqlar weyran bolghanliqi, su ambarliri we ériq-östenglerdin tashqan su yollarni bésip kétip qatnash üzülüp qalghanliqi, 6-séntebir seyshenbe künidiki deslepki statistikida qaghiliq we toqquzaq nahiyiliridin texminen 160 ming ahalining apetke uchrighanliqi tilgha élin'ghan.

Qaghiliq nahiyisidin ziyaritimizni qobul qilghan bir Uyghur 5-séntebir yaqqan yamghurni teswirlep, düshenbe küni yaqqan güldürmamiliq qara yamghurni, höl yéghin köp dep teswirlinidighan ürümchide 5 yil oqughan mezgildimu körmigenlikini, qaghiliq baziridila binaliq öylerdin bashqa öylerning hemmisidin dégüdek yamghur ötüp, yollarni su bésip ketkenlikini, etraptiki yézilarda ehwalning téximu éghir bolushi mumkinlikini bildürdi.

Bu yil 6-ayning otturiliri ramizan mezgilide Uyghur élining ili wadisidiki toqquztara, nilqa, künes, ghulja nahiyiliri, chöchekning toli, uchturpan qatarliq nahiyilerde qattiq yamghur we kelkün apiti yüz bérip étizdiki bughdaylarni su bésip kétish, mal-charwilar éqip kétish, öy-qotanlar örülüsh hetta adem ölüsh ehwalliri yüz bergen. Apettin kéyin ziyaritimizni qobul qilghan Uyghurlar, apet éghir bolghini üchün hökümetning bergen yardemlirining déhqanlar uchrighan ziyanlirining ornini toldurushqa yetmigenlikini bildürgen bolup, bu qétim qonaq qatarliq zira'etler téxi yighiwélinmighan mezgilde qeshqerde yaqqan qattiq yamghurning déhqanchiliq we baqmichiliq bilen turmushini qamdap kéliwatqan Uyghur déhqanlirigha yene bir qétimliq iqtisadiy ziyan we bésim élip kélidighanliqi mölcherlenmekte.

Toluq bet