Yéngi teshwiqat filimi-"Teklimakandiki naghra sadasi" ürümchide tunji meydan qoyuldi

Muxbirimiz ümidwar
2017-04-23
Élxet
Pikir
Share
Print

Tengritagh kino studiyisi ishligen "Teklimakandiki naghra sadasi"namliq hékaye filim ötken hepte béyjingda qoyulup, teshwiq qilin'ghandin kéyin, 22-april küni Uyghur aptonom rayonining bir qisim yuqiri derijilik rehberlirini öz ichige alghan 700 etrapida kishining qatnishishi bilen tunji qétim ürümchide qoyulush murasimi ötküzülgen.

Tengritagh torining xewiride ilgiri sürülüshiche, filimde 2010-yili xitay merkizi hökümiti mexsus "Shinjang xizmet yighini"échip, Uyghur rayonigha qarita bir yürüsh ijtima'iy-iqtisadi siyasetlerni yürgüzgenidin buyanqi 6 yil ichidiki "Zor tereqqiyatlar" teswirlen'gen.

Filimde aygul isimlik bir yéza qizining yézigha ewetilgen xizmet etritining qollishi we yardimi bilen öz arzusini emelge ashurghanliqi, xelqning" milletler ittipaqliqi, ijtima'iy muqimliqi"ni qoghdashqa bolghan intilishi we bashqa terepler gewdilendürülgen.

Mezkur filim heqqidiki bahalar we teshwiqat xewerlirige diqqet qilip kéliwatqan, amérika Uyghurliri birleshmisi re'isi ilshat hesen ependi bu filimning tipik siyasiy teshwiqat matériyali ikenlikini körsitip: "Bu filimning qattiq sen'et ölchimi, körermenlerning bedi'iy qiziqishi we zoqlinish éhtiyajidin chiqish qilinmastin, belki siyasiy teshwiqat qorali süpitide paydilinish éhtiyaji üchün mexsus ishlen'genliki éniq, shunga bu filimning buningdin kéyin da'iriler teripidin teshwiq qilinip, xelqqe téngip körsitilishi tebi'iy ehwal" dédi.

Melumki, "Tengritagh kino studiyisi" ötken esirning 1980-yilliridin bashlap, bir qisim hékaye filimlerni ishligen bolup, "Renaning toyi", "Artist bolmaydighan qiz", "Yétim qizning muhebbiti", "Sirliq karwan" qatarliq filimler körermenlerning melum derijide alqishigha érishken idi. Bularning ichide "Yétim qizning muhebbiti" Uyghur we qazaqlarning 1944-1949-yillardiki milli inqilabi témisigha a'it bolup, xitay hökümiti tunji qétim bu filimde milli armiyening qazaq we Uyghur jengchilirining ay yultuzluq bayriqi, herbiy kakarliri, urush we herbiy hayatini körsetken idi. Ilshat hesen ependi da'irilerning buningdin kéyin mundaq filimni qayta ishlishi mumkin emeslikini, uning eksiche, "Teklimakandiki naghra sadasi" gha oxshash siyasi teshwiqat filimlirige köplep meblegh salidighanliqini bildürdi.

Toluq bet