Ré'aktip ayropilan we alem kémisining matorini oghrilashqa urun'ghan bir guruh xitaylar amérikida eyiblendi

Muxbirimiz shöhret hoshur
2018-10-31
Élxet
Pikir
Share
Print

Roytérs agéntliqining bügünki xewirige qarighanda, xitayning jyangsu ölkilik dölet xewpsizliki nazaritige tewe bolghan bir guruh xitay xadimlar amérika edliye tarmaqliri teripidin jasusluq bilen eyiblen'gen.

30-Öktebir küni ashkarilan'ghan bu heqtiki eyibnamide déyilishiche, xitayning dölet xewpsizliki orginigha tewe bolghan mezkur xadimlar kompyutér hujumchiliri, yeni (xakkérlar) we alaqidar shirket xadimlirini yalliwélip, amérikining ré'aktipliq ayropilanliri bilen alem kémilirige munasiwetlik mator sistémisining isxémisini oghrilashqa urun'ghan.

Eyibnamide chüshendürülüshiche, amérikining awi'atsiye sahesidiki 10 muhim shirkiti xakkérlarning hujumigha uchrighan. Tor hujumchiliri we yalliwélin'ghan shirket xadimliri bilen alaqisi bolghan ja rong, chey méng qatarliq 10 neper xitay dölet xewpsizliki xadimliri mezkur eyibnamide jasusluq jinayiti bilen eyiblen'gen.

Eyibnamide xitay terepning mezkur ayropilan matori isxémisini oghrilash arqiliq tetqiqat élip barmay we chiqim tartmay turup özlirige xas ayropilan matori yasimaqchi bolghanliqi eskertilgen. Xitay tashqi ishlar ministirliqining bayanatchisi lu kang bügün inkas qayturup, amérika terepning bu eyibnamisining asassizliqini, mezkur jasusluq délosining bir toqulma hékaye ikenlikini eskertken.

Amérika adalet ministirliqining dölet xewpsizlikige mes'ul xadimi jon démérs bügün bu heqte pikir bayan qilip, buning bir bashlinish ikenlikini, buningdin kéyin amérikining özining eqliy mülükliri bilen mebleghlirining oghrilinishigha qet'iy yol qoymaydighanliqini tekitligen. Melum bolushiche, bu amérikining yéqinqi ikki ay ichide xitaygha alaqidar 3‏-jasusluq délosini pash qilishi iken.

Toluq bet