«Йәр шари вақти гезити»: «хитай тәйвәнгә һәрбий һәрикәт йүргүзүшкә тәйяр болуши керәк»

Мухбиримиз ирадә
2018-03-22
Елхәт
Пикир
Share
Принт

Хитайниң «йәршари вақти гезити» пәйшәнбә күнидики баш мақалисидә «хитай тәйвәнгә һәрбий һәрикәт йүргүзүшкә тәйяр болуши керәк,» дәп җар салған.

Бу һәптиниң бешида америка-тәйвән арисидики рәсмий мунасивәтләрни күчәйтиш мәқсәт қилинған «тәйвән саяһәт қануни» америка президенти доналд трампниң имзалиши билән рәсмий күчкә игә болған иди. Америкиниң бу һәрикити тәйвәнниң қизғин алқишиға еришкән, әмма хитай һөкүмитиниң күчлүк наразилиқини қозғиған.

Хитай компартийәсиниң һөкүмәт канийи һесабланған «йәршари вақти гезити» дә елан қилинған мәзкур мақалидә, хитайниң америкиниң бу һәрикитигә чоқум «қайтурма зәрбә» бериши керәклики қаттиқ позитсийәдә тәкитләнгән.

Мақалидә йәнә мундақ дейилгән: «хитай чоң қуруқлуқи чоқум тәйвәнгә қарита биваситә қораллиқ тоқунушқа тәйярлиниши керәк. Хитай тәйвәнгә очуқ қилип, америка - тәйвән һөкүмәт әмәлдарлири арисида рәсмий зиярәтләрниң тәйвәнгә еғир ақивәтләрни елип келидиғанлиқини очуқ билдүрүп қоюши керәк.»

Ройтерс агентлиқиниң хәвиридин қариғанда, чаршәнбә күни америкиниң муавин дөләт ишлири министирлиридин бири болған алекс воң тәйвәнни зиярәт қилғанда сөз қилип, «америкиниң тәйвән билән болған алақиси бүгүнкидәк күчлүк болуп бақмиған иди. Тәйвән арили пүткүл һинди - тинч окян райони үчүн бир илһам болуп һесаблиниду,» дегән.

Мәлум болушичә, бу һәптә ичидә америкиниң йәнә бир юқири дәриҗилик әмәлдари болған америка сода министирлиқиниң ишләпчиришқа мәсул муавин министири иан ситиф тәйвәнни зиярәт қилидикән.

Алдинқи күни хитай дөләт рәиси ши җинпиң хитай хәлқ қурултийиниң йепилиш мурасимида қилған сөзидә хитайни бөлүшни мәқсәт қилған һәрқандақ бир һәрикәткә қарши «қанлиқ уруш» қилишқа тәйярлиқини билдүргән иди. Ши җинпиңниң юқириқи сөзи хәлқара мәтбуатларниң күчлүк диққитини қозғиди.

Пикирләр (0)
Share
Толуқ бәт