"Yer shari waqti géziti": "Xitay teywen'ge herbiy heriket yürgüzüshke teyyar bolushi kérek"

Muxbirimiz irade
2018-03-22
Élxet
Pikir
Share
Print

Xitayning "Yershari waqti géziti" peyshenbe künidiki bash maqaliside "Xitay teywen'ge herbiy heriket yürgüzüshke teyyar bolushi kérek," dep jar salghan.

Bu heptining béshida amérika-teywen arisidiki resmiy munasiwetlerni kücheytish meqset qilin'ghan "Teywen sayahet qanuni" amérika prézidénti donald trampning imzalishi bilen resmiy küchke ige bolghan idi. Amérikining bu herikiti teywenning qizghin alqishigha érishken, emma xitay hökümitining küchlük naraziliqini qozghighan.

Xitay kompartiyesining hökümet kaniyi hésablan'ghan "Yershari waqti géziti" de élan qilin'ghan mezkur maqalide, xitayning amérikining bu herikitige choqum "Qayturma zerbe" bérishi kérekliki qattiq pozitsiyede tekitlen'gen.

Maqalide yene mundaq déyilgen: "Xitay chong quruqluqi choqum teywen'ge qarita biwasite qoralliq toqunushqa teyyarlinishi kérek. Xitay teywen'ge ochuq qilip, amérika - teywen hökümet emeldarliri arisida resmiy ziyaretlerning teywen'ge éghir aqiwetlerni élip kélidighanliqini ochuq bildürüp qoyushi kérek."

Roytérs agéntliqining xewiridin qarighanda, charshenbe küni amérikining mu'awin dölet ishliri ministirliridin biri bolghan aléks wong teywenni ziyaret qilghanda söz qilip, "Amérikining teywen bilen bolghan alaqisi bügünkidek küchlük bolup baqmighan idi. Teywen arili pütkül hindi - tinch okyan rayoni üchün bir ilham bolup hésablinidu," dégen.

Melum bolushiche, bu hepte ichide amérikining yene bir yuqiri derijilik emeldari bolghan amérika soda ministirliqining ishlepchirishqa mes'ul mu'awin ministiri i'an sitif teywenni ziyaret qilidiken.

Aldinqi küni xitay dölet re'isi shi jinping xitay xelq qurultiyining yépilish murasimida qilghan sözide xitayni bölüshni meqset qilghan herqandaq bir heriketke qarshi "Qanliq urush" qilishqa teyyarliqini bildürgen idi. Shi jinpingning yuqiriqi sözi xelq'ara metbu'atlarning küchlük diqqitini qozghidi.

Toluq bet