Тәйвән президентиниң латин америка сәпиридә америкида тохтап өтүш еһтималлиқи хитайни нарази қилди

Мухбиримиз ирадә
2016-12-20
Елхәт
Пикир
Share
Принт

Тәйвән һөкүмәт баянатчиси алекис хуаң сәйшәнбә күнидики баянатида, тәйвән президенти сәй йиңвенниң латин америка дөләтлиригә қаратқан рәсмий зияритиниң хитай һөкүмитиниң наразилиқиға қаримай келәр ай әсли пилан бойичә елип берилидиғанлиқини билдүргән.

Ройтерсниң хәвәр қилишичә, сәй йиңвен бу зияритидә алди билән америкида тохтап өтүши вә яки америкида айропилан алмишиши мумкинчилики болғачқа, хитай буниңға қаршилиқ билдүргән икән. Хитай тәрәп буниң тәйвәндики мустәқиллиқ тәрәпдарлириға «хата сигнал» берип қойидиғанлиқини ейтқан. Хитай ташқи ишлар баянатчиси хуа чүнйиң бүгүнки баянатида юқиридики сөзни қайта тәкитләп «сәй йиңвенниң америкида тохтап өтүш еһтималлиқида униң һәқиқий нийитиниң немилики изаһат тәләп қилиду» дегән.

Тәйвән һөкүмәт баянатчиси алекс бүгүнки баянатида мухбирларниң бу һәқтики соалиға җаваб бәрмигән. Әмма тәйвәндики бир қисим ахбарат органлири сәй йиңвенниң бу қетимқи зияритидә доналд трамп һөкүмитиниң адәмлири билән көрүшүши мумкинликини хәвәр қилған.

Доналд трамп 1979-йилидин буян, тәйвән президентиниң тәбрик телефонини қобул қилған тунҗи америка президенти. Униң бу һәрикити хитайни қаттиқ нарази қилған, әмма доналд трамп униңға инкас қайтуруп
«Һечким мениң кимниң телефонини қобул қилиш-қилмаслиқимға арилишалмайду» дегән.

Пикирләр (0)
Share
Толуқ бәт