Тәйвән президенти тәйвән қораллиқ күчлирини хитайниң қораллиқ тәһдитигә қарши тәдбир елишқа буйруди

Мухбиримиз әзиз
2017-12-29
Елхәт
Пикир
Share
Принт

Тәйвән президенти сәй йиңвен алдинқи күни тәйвән қораллиқ күчлирини хитайниң һәрбий һәрикити вә униң қораллиқ тәһдитини йеқиндин көзитишкә вә тегишлик тәдбир елишқа буйруған. Сәй йиңвен тәйвән армийисиниң мәлум бир һәрбий базисидики әслиһәлирини зиярәт қилғанда, уларни хитайниң қораллиқ тәһдитидин һошяр болушқа агаһландурған.

Чәтәл ахбарат васитилириниң хәвәр қилишичә, сәй йиңвен: «хитай чоң қуруқлуқиниң йеқиндин буян арқа-арқидин елип барған шәрқий асия районидики һәрбий һәрикити районниң бихәтәрлики вә муқимлиқиға мәлум дәриҗидә тәсир қилишқа башлиди. Дөлитимиз изчил район бихәтәрлики вә тинчлиқиға төһпә қошуп кәлди. Шуңа, җуңхуа минго армийиси компартийә армийисиниң һәрикитини һәр вақит тәқиб қилип туруши вә шундақла зөрүр тәдбирләрни елип, дөлитимизниң бихәтәрлики, районниң тинчлиқи вә муқимлиқиға капаләтлик қилиши керәк,» дегән.

Сәй йиңвен өткән йилниң башлири тәйвән президент сайлимида ғәлибә қилип, вәзипигә олтурғандин бери хитайниң изчил дүшмәнликигә учрап кәлди. Хитай қораллиқ қисимлири йеқиндин буян тәйвән әтрапида арқа-арқидин һава армийә маневири елип барған. Тәйвән дөләт мудапиә министирлиқи бу һәптә елан қилған мудапиә ақ ташлиқ китабида, хитайниң һәрбий тәһдити күчийиватқанлиқи, униң өткән бир йилда 25 қетим һава маневири елип барғанлиқини агаһландурған. Лекин бейҗиң һәрбий даирилири маневирниң нормал мәшиқ икәнлики, тәйвәнниң буниңға көнүп қалидиғанлиқини билдүргән иди.

Ройтерс агентлиқиниң хәвиридә баян қилинишичә, сәй йиңвен җүмә күни өткүзгән ахбарат йиғинида «хитайниң һәрбий һәрикити ялғуз тәйвән боғузиниң вәзийитигә тәсир қилмайватиду. . . У охшашла пүтүн шәрқий асияға тәсир қиливатиду. Бу ялғуз тәйвән дуч келиватқан тәһдит әмәс,» дегән. Бәзи анализчилар хитайниң һәрбий һәрикити униң тәйвәнни қораллиқ ишғал қилиш қарариға кәлгәнликидин дерәк беридиғанлиқини билдүргән. Лекин сәй йиңвен, хитайниң һазирқи шараитта тәйвәнгә һуҗум қилиш еһтимали барлиқини чәткә қаққан.

Толуқ бәт