Teywen prézidénti teywen qoralliq küchlirini xitayning qoralliq tehditige qarshi tedbir élishqa buyrudi

Muxbirimiz eziz
2017-12-29
Élxet
Pikir
Share
Print

Teywen prézidénti sey yingwén aldinqi küni teywen qoralliq küchlirini xitayning herbiy herikiti we uning qoralliq tehditini yéqindin közitishke we tégishlik tedbir élishqa buyrughan. Sey yingwén teywen armiyisining melum bir herbiy bazisidiki eslihelirini ziyaret qilghanda, ularni xitayning qoralliq tehditidin hoshyar bolushqa agahlandurghan.

Chet'el axbarat wasitilirining xewer qilishiche, sey yingwén: "Xitay chong quruqluqining yéqindin buyan arqa-arqidin élip barghan sherqiy asiya rayonidiki herbiy herikiti rayonning bixeterliki we muqimliqigha melum derijide tesir qilishqa bashlidi. Dölitimiz izchil rayon bixeterliki we tinchliqigha töhpe qoshup keldi. Shunga, jungxu'a min'go armiyisi kompartiye armiyisining herikitini her waqit teqib qilip turushi we shundaqla zörür tedbirlerni élip, dölitimizning bixeterliki, rayonning tinchliqi we muqimliqigha kapaletlik qilishi kérek," dégen.

Sey yingwén ötken yilning bashliri teywen prézidént saylimida ghelibe qilip, wezipige olturghandin béri xitayning izchil düshmenlikige uchrap keldi. Xitay qoralliq qisimliri yéqindin buyan teywen etrapida arqa-arqidin hawa armiye manéwiri élip barghan. Teywen dölet mudapi'e ministirliqi bu hepte élan qilghan mudapi'e aq tashliq kitabida, xitayning herbiy tehditi küchiyiwatqanliqi, uning ötken bir yilda 25 qétim hawa manéwiri élip barghanliqini agahlandurghan. Lékin béyjing herbiy da'iriliri manéwirning normal meshiq ikenliki, teywenning buninggha könüp qalidighanliqini bildürgen idi.

Roytérs agéntliqining xewiride bayan qilinishiche, sey yingwén jüme küni ötküzgen axbarat yighinida "Xitayning herbiy herikiti yalghuz teywen boghuzining weziyitige tesir qilmaywatidu. . . U oxshashla pütün sherqiy asiyagha tesir qiliwatidu. Bu yalghuz teywen duch kéliwatqan tehdit emes," dégen. Bezi analizchilar xitayning herbiy herikiti uning teywenni qoralliq ishghal qilish qararigha kelgenlikidin dérek béridighanliqini bildürgen. Lékin sey yingwén, xitayning hazirqi shara'itta teywen'ge hujum qilish éhtimali barliqini chetke qaqqan.

Toluq bet