Чәрчән наһийиси тиғлиқ әсвапларға 1‏-январдин бурун номур қойдуруп болушни тәләп қилған

Мухбиримиз әзиз
2017-12-29
Елхәт
Пикир
Share
Принт

Чәрчән наһийисиниң җаһанбағ аһалиләр райони 27‏-декабир өз тәвәликидики аһалиларға уқтуруш чиқирип, уларниң аилидики тиғлиқ әсвапларға 1‏-январдин бурун номур қойдуруп болушини тәләп қилған.

Уқтурушта, бу чәктин бурун номур қойдурмиғанларниң ақивитигә өзи игә болидиғанлиқи агаһландурулған. Бирақ номур қойдурмиғанларниң қандақ ақивәткә қалидиғанлиқи тилға елинмиған. Хитай даирилири уйғур аптоном районида өткән йилдин башлап пуқраларниң аилидики пичақ, қиңрақ, палта, җоту, чалға қатарлиқ тиғлиқ әсваплириға «иккилик код» ойдурушини тәләп қилған. Йәрлик даириләр бу бәлгилиминиң аталмиш «ашқунлуқ», «террорлуқ» қа тақабил туруш мәқситидә чиқирилғанлиқини илгири сүргән.

Лекин кишилик һоқуқ тәшкилатлири буниң «террорлуқ» «ашқунлуқ» билән алақиси йоқлуқини, «ашқунлуқ» вә «террорлуқ» қа тақабил турушниң йоли уйғурларниң диний, мәдәнийәт тәрәққияти вә кишилик әркинликигә һөрмәт қилиш икәнликини илгири сүргән. Тиғлиқ әсвапларға номур қоюш әң бурун ақсуниң тоқсу наһийисидә йолға қоюлған. Чәрчән наһийисиниң қачандин башлап тиғлиқ әсвапларға номур қоюшни йолға қойғанлиқи мәлум әмәс.

Әмма чәрчән наһийиси җаһанбағ аһалиләр райониниң 27‏-декабир чиқарған уқтурушида, тиғлиқ әсвапларға номур қоюш сүрүки тошушқа 4 күн қалғанлиқини билдүргән. Униңда «тиғлиқ әсвапларға номур қоюш мушу айниң 31‏-күни ахирлишиду. 3 Күн ичидә номур урғузуш керәк. Урғузмиғанлар өзи ақивәткә мәсул болиду,» дейилгән.

Уйғур кишилик һоқуқ тәшкилатлири хитайниң тиғлиқ әсвапларға номур урғузуши униң феодал сулалиләр дәвридә йолға қоюлған пуқраларни контрол қилиштики «қалақ иптидаий усули» икәнлики, униң бу усулни 21‏-әсирдә уйғур районида йолға қоюши «әқилгә сиғмайдиғанлиқи» ни билдүргән иди.

Пикирләр (0)
Share
Толуқ бәт