جۇڭگو مىللەتلەر تىل-يېزىق تەرجىمە ئىدارىسى قۇرۇلغانلىقىنىڭ 60 يىللىق پائالىيىتى خەلقئارادىكى كۆزەتكۈچىلەردە باشقىچە پىكىر پەيدا قىلماقتا

مۇخبىرىمىز قۇتلان
2015-12-14
ئېلخەت
پىكىر
Share
پرىنت

خەلق تورى ئۇيغۇرچە قانىلىنىڭ خەۋىرىگە قارىغاندا، جۇڭگو مىللەتلەر تىل-يېزىق تەرجىمە ئىدارىسى قۇرۇلغانلىقىنىڭ 60 يىللىقىنى تەبرىكلەش پائالىيىتى 11-دېكابىر كۈنى بېيجىڭدا ئۆتكۈزۈلگەن.

مەزكۇر پائالىيەتكە خىتاي مەملىكەتلىك خەلق قۇرۇلتىيى بىلەن خىتاي مەملىكەتلىك سىياسىي كېڭىشىنىڭ مۇناسىۋەتلىك رەھبەرلىرى قاتناشقان. پائالىيەت داۋامىدا خىتايدىكى ئاز سانلىق مىللەتلەرنىڭ تىل-يېزىق ۋە تەرجىمە خىزمىتىگە دائىر مەخسۇس كۆرگەزمە كۆرسىتىلگەن.

مەلۇمكى، بېيجىڭدىكى جۇڭگو مىللەتلەر تىل-يېزىق تەرجىمە ئىدارىسى بۇنىڭدىن 60 يىل بۇرۇن خىتاي باش مىنىستىرى جۇ ئېنلەي بىلەن ھازىرقى دۆلەت رەئىسى شى جىنپىڭنىڭ دادىسى شى جۇڭشۈننىڭ تەستىقى بىلەن قۇرۇلغان ئىكەن.

ئىگىلىنىشىچە، مەزكۇر ئىدارە قارمىقىدا ئۇيغۇر، موڭغۇل، تىبەت، قازاق، كورېيان، يىزۇ، جۇاڭزۇ بۆلۈملىرى بار بولۇپ، ئۇلارنىڭ ئاساسلىق خىزمەت ۋەزىپىسى خىتاي كومپارتىيەسىنىڭ مۇھىم ھۆججەتلىرى، قارارلىرى ۋە خىتاي مەركىزىدىكى يىغىنلارنىڭ روھىنى ئاز سانلىق مىللەتلەر تىل-يېزىقىغا تەرجىمە قىلىش ئىكەن.

كۆزەتكۈچىلەر، 60 يىللىقى تەبرىكلىنىۋاتقان بېيجىڭدىكى مەركىزىي تەرجىمە ئىدارىسىنىڭ ئەمەلىيەتتە خىتاي كومپارتىيەسىنىڭ ئاز سانلىق مىللەتلەر تىل-يېزىقىدىكى كانىيى ئىكەنلىكىنى تەكىتلىدى. ئۇلار، خىتاي ھۆكۈمىتى «قوش تىللىق مائارىپ» ۋىۋىسكىسى بىلەن ئۇيغۇر، تىبەت ۋە باشقا يەرلىك مىللەتلەر رايونىدا مىللىي تىل-يېزىقلارنىڭ رولىنى ئاجىزلاشتۇرۇشقا ئۇرۇنۇۋاتقان بولسىمۇ، لېكىن بېيجىڭدىكى مەركىزىي تەرجىمە ئىدارىسىنى ئىزچىل ساقلاپ كەلمەكتە، دېگەنلەرنى ئىلگىرى سۈردى.

پىكىرلەر (0)
Share
تولۇق بەت