Канада хитайни канаданиң һөкүмәт ториға һуҗум қилиш билән әйиблиди

Мухбиримиз әркин
2014-07-30
Елхәт
Пикир
Share
Принт

Канада чаршәнбә күни хитай тор бузарлириниң канада һөкүмәт ториға һуҗум қилғанлиқини елан қилип, бейҗиң даирилиригә рәсмий наразилиқ билдүргән. Канада даирилириниң илгири сүрүшичә, дөләтниң қоллишидики юқири техникилиқ хитай тор бузарлири йеқинда канада дөләтлик тәтқиқат кеңишиниң ториға бузуп киргән.

Канада илгири өзиниң тор һуҗумиға учриғанлиқини елан қилған болсиму, бирақ қайси дөләтниң һуҗумиға учриғанлиқини тилға алмиған иди. Лекин чаршәнбә күни канада ташқи ишлар министирлиқи һуҗумниң хитайдин кәлгәнликини билдүрди.

Канада ташқи ишлар министири җон бейрдниң баянатчиси, канада ташқи ишлар министириниң сәйшәнбә күни бейҗиңда хитай ташқи ишлар министири ваң йи билән көрүшүп, бу тоғрулуқ канада тәрәпниң пикрини толуқ оттуриға қойғанлиқини қәйт қилди.

Баянатчиси адам хоҗ: канада һөкүмити бу мәсилигә наһайити җиддий қарайду, биз буни бейҗиң вә оттавадики юқири дәриҗиликләр учрушишида оттуриға қойдуқ, деди.

Канада тәтқиқат кеңиши мәзкур әлниң асаслиқ тәтқиқат орунлириниң бири болуп, униң атақлиқ канада айропилан, пойиз ишләпчиқириш карханиси-бомбардер билән йеқин һәмкарлиқ мунасивити бар. Лекин хитайниң канадада турушлуқ әлчиханисиниң баянатчиси, бейҗиңниң тор һуҗумиға четишлиқ икәнликини рәт қилған.

Пикирләр (0)
Share
Толуқ бәт