Türkiye-rusiye S-400 tipliq bashqurulidighan bomba sistémisi kélishimi imzalidi

Muxbirimiz jüme
2017-12-30
Élxet
Pikir
Share
Print

Jüme küni türkiye rusiye da'iriliri bilen S-400 tipliq bashqurulidighan bomba mudapi'e sistémisini sétiwélishi kélishimi imzalighan.

Roytérsning xewer qilishiche, bu 2 milyard 500 milyon dollar qimmitidiki bashqurulidighan bomba sistémisi shimaliy atlantik ehti teshkilati - nato da'irilirini bi'aram qilghan.

Türkiyemu natogha eza bolup, natogha eza eller-ara ortaq mudapi'e kélishimi bar. Bu kélishim boyiche nato armiyelirining birlikte heriket qilishini kapaletke ige qilish üchün armiyeler herbiy buyruqlarnimu ortaq chüshürgili bolidighan shekilde bir-birige maslashturulghan.

Shu sewebtin nato da'iriliri rusiye téxnikisini nato herbiy téxnikisi bilen birleshtürgili bolmaydu, dep endishe qilidiken.

Kélishim boyiche rusiye da'iriliri bashqurulidighan bomba sistémisini 2020-yili martning aldinqi yérimida türkiyening qoligha yetküzidiken. 

Bashqa axbaratlargha qarighanda, ikki terep arisidiki mezkur bashqurulidighan bomba söhbiti bir yil awalla bashlan'ghan we asasiy jehettin tamamlan'ghan bolsimu, kélishim imzalash bu sistémini sétiwélishqa kétidighan meblegh mesilisi tüpeyli keynige sürülgen iken. 

Xewerlerge qarighanda, enqere da'iriliri bu bomba sistémisigha kétidighan pulning 45 pirsentini bashta biraqla töleydiken. Qalghan 55 pirsentini rusiyedin qerz alidiken. 

Türkiyedin chiqidighan "Höriyet géziti" ning xewer qilishiche, bu heqte toxtalghan türkiye prézidénti rejep tayyip erdoghan qerzni dollar sheklide emes, rusiye rublisi sheklide alidighanliqini bildürgen. Uning axbaratlargha éytishiche, shundaq bolghan ösüm chiqimidin 3 pirsent téjep qalghini bolidiken. 

Charshenbe küni rusiye döletlik rustek guruhining bashliqi sérgéy chémézow rusiye axbaratlirigha rusiyening türkiyege S-400 tipliq bashqurulidighan bomba sistémidin 4 ni béridighanliqini bildürgen. 

Halbuki jüme künidiki xewerlerde türkiyening hazirche bu xil sistémidin peqet ikkinila sétiwalidighanliqi ilgiri sürülgen.

Melum bolushiche, bu bashqurulidighan bombilar türkiyege ötküzüp bérilgendin kéyin, pütünley türk qoralliq qisimlirining bashqurushida bolidiken. Bomba meshghulatigha rusiye meslihetchiliri arilashturulmaydiken. 

Bir nechche yil ilgiri türkiye da'iriliri bashqurulidighan bomba sistémisini xitaydin sétiwalidighanliqini élan qilip, kéyin sodidin waz kechken idi.

Toluq bet