تۈركىيە ھۆكۈمىتى تۈرك ۋەتەنداشلىقىغا ئۆتكەن ئۇيغۇرلارنىڭ ئۆز كىملىكىدە تۇغۇلغان يۇرتىنى يېزىشىغا يول قويىدىكەن

مۇخبىرىمىز قۇتلان
2015-01-30
ئېلخەت
پىكىر
Share
پرىنت

تۈركىيە جۇمھۇرىيىتى ئىچكى ئىشلار مىنىستىرلىقى يېقىندا مەخسۇس بەلگىلىمە چىقىرىپ، تۈركىيە ۋەتەنداشلىقىغا ئۆتكەن ئۇيغۇرلارنىڭ پاسپورت ۋە كىملىكىدە تۇغۇلغان يۇرتىنى يېزىشىغا يول قويىدىغانلىقىنى بىلدۈرگەن.

مەلۇمكى، خىتاي دائىرىلىرىنىڭ ئۇيغۇرلارغا بېجىرگەن پاسپورتلىرىدا شەخسلەرنىڭ تۇغۇلغان يېرىنى بىردەك «خىتاي» ياكى «شىنجاڭ» دېگەن ناملار بىلەن يېزىشى مۇھاجىرەتتىكى ئۇيغۇرلارنىڭ كۈچلۈك نارازىلىقىنى قوزغاپ كەلگەن ئىدى.

يېقىندا تۈركىيە ئىچكى ئىشلار مىنىستىرلىقى بۇ ھەقتە ئۇقتۇرۇش چىقىرىپ، تۈركىيە پۇقرالىقىغا ئۆتكەن ئۇيغۇرلارنىڭ پاسپورت ۋە كىملىكىدىكى تۇغۇلغان يېرىنى ئۆزىنىڭ كىندىك قېنى تۆكۈلگەن ئانا يۇرتىنىڭ ناملىرىغا ئۆزگەرتسە بولىدىغانلىقىنى ئېلان قىلغان. يەنى تۈركىيە پۇقرالىقىغا ئۆتكەن ھەرقانداق ئۇيغۇر ئىلگىرىكى كىملىك كارتىسىدىكى «تۇغۇلغان يېرى» دېگەن كاتەكچىگە مەجبۇرىي يېزىلغان «چىن» ياكى «شىنجاڭ» دېگەن ناملارنى ئۆچۈرۈپ، ئۇنىڭ ئورنىغا ئۆزى تۇغۇلغان يۇرتنىڭ ناملىرىنى، مەسىلەن، قەشقەر، خوتەن، ئۈرۈمچى ياكى غۇلجا دېگەندەك ئۇيغۇرچە يەر ناملىرىنى يازسا بولىدىكەن.

كۆزەتكۈچىلەر، تۈركىيە ھۆكۈمىتىنىڭ بۇ قارارى، مۇھاجىرەتتىكى ئۇيغۇرلارنىڭ پاسپورت ۋە كىملىكلىرىدە خىتاي ھۆكۈمىتى تەرىپىدىن مەجبۇرىي خىتايلاشتۇرۇلغان ئىسىم-فامىلە ۋە يۇرت ناملىرىنى ئەسلىگە كەلتۈرۇشتىكى بىر ئىجابىي قەدەم، دەپ قارىماقتا.

پىكىرلەر (0)
Share
تولۇق بەت