ئەردوغان 4 نەپەر مىنىستىرى خىيانەتچىلىككە چېتىلىپ قالغان تۈركىيە ھۆكۈمىتىنىڭ ئىچكى كابىنېتنى تەرتىپكە سالدى

مۇخبىرىمىز ئەركىن
2013-12-26
ئېلخەت
پىكىر
Share
پرىنت

تۈركىيە باش مىنىستىرى رەجەپ تاييىپ ئەردوغاننىڭ خىيانەتچىلىككە چېتىلىپ قالغان 3 نەپەر ئىچكى كابېنت مىنىستىرى، ئۆكتىچىلەرنىڭ قاتتىق بېسىمىدا چارشەنبە كۈنى ۋەزىپىسىدىن ئىستېپا بېرىشكە مەجبۇر بولدى.

ئەردوغان ھۆكۈمىتىنىڭ ئوبرازى بۇ قېتىمقى خىيانەتچىلىك ۋەقەسىدە قاتتىق زەربىگە ئۇچرىغان. ئۇ، پەيشەنبە كۈنى ئىچكى كابنېتنى تەرتىپكە سېلىپ، 10 نەپەر مىنىستىرنى ئالماشتۇردى. خىيانەتچىلىككە چېتىشلىق ياۋروپا ئىشلىرىغا مەئۇل مىنىستىر ئەگەمەن باغىش ئىستېپا بەرمىگەن بولسىمۇ، بىراق ئەردوغان ئۇنىڭ ئورنىغا باشقا بىر كىشىنى ئالماشتۇردى.

تۈركىيە ھۆكۈمىتىدىكى بۇ كرىزىس، 17‏-دېكابىر ئىستانبۇل باش تەپتىش مەھكىمىسىنىڭ ئىقتىساد مىنىستىرى چاغلايان، ئىچكى ئىشلار مىنىستىرى گۈلەر، مۇھىت ۋە شەھەر قۇرۇلۇشى مىنىستىرى بايراقدارنىڭ ئوغۇللىرىنى، تۈركىيە خەلق بانكىسىنىڭ مۇدىرىنى خىيانەتچىلىك بىلەن ئەيىبلەپ قولغا ئېلىشى بىلەن پارتلىدى.

ئەردوغان بۇ ۋەقەنى فەتقۇللاھ گۈلەن جامائىتىنىڭ خەلقئارا كۈچلەر بىلەن تىل بىرىكتۈرۈپ ئېلىپ بارغان سۇيىقەستى، دەپ تەنقىد قىلىپ، جامائەتكە يېقىن دەپ قارالغان نۇرغۇن ساقچى باشلىقىنى ۋەزىپىسىدىن ئېلىپ تاشلىغان. ئەدلىيەنىڭ خىيانەتچىلىك ۋەقەلىرىنى سۈرۈشتۈرۈشكە مۇناسىۋەتلىك ئالاقىدار بەلگىلىمىلىرىگە ئۆزگەرتىش كىرگۈزگەن. بىراق ئۆكتىچىلەر، ئەردوغاننىڭ بۇ ھەرىكىتىنى خىيانەتچىلىكنى سۈرۈشتۈرۈشكە توسقۇنلۇق قىلىش، دەپ تەنقىد قىلغان ئىدى.

پىكىرلەر (0)
Share
تولۇق بەت