Түркмәнистанда президент ниязофниң «роһнамә» намлиқ китаби имтиһан елиштин бикар қилинди

Мухбиримиз үмидвар
2014-07-13
Елхәт
Пикир
Share
Принт

Оттура асиядики нефит вә тәбиий газ дөлити түркмәнистан җумһурийитидә 10 нәччә йилдин буян тунҗи қетим сабиқ президент сәпәр мурат ниязофниң китаби «роһнамә» алий маарип имтиһанидин чиқириветилди.

Русийәнниң хәвәрләр агентлиқиниң хәвәр қилишичә, президент гурбангули бәрдимуһәммәдоф буйруқ чүшүрүп, «роһнамә»ни алий мәктәпләргә кириштики муһим имтиһан қилишни бикар қилип, униң орниға түркмәнистан тарихи вә иҗтимаий җәмийәт пени бойичә имтиһан беришни бекиткән.

«Роһнамә» намлиқ китаб сабиқ президент, түркмән баши сәпәр мурат ниязоф тәрипидин 2001 - йили йезилғандин кейин, у мәзкур китабни пүтүн түркмәнистан җумһурийитиниң мәниви дәстури қилип бекиткән һәмдә мәктәп оқуғучилири, идарә - җәмийәтниң чоқум өгинишини шәрт қилған иди.

Түркмән баши өлгәндин кейин униң орнини игилигән гурбангүли бәрдимуһәммәдоф бу китабқа болған чәклимини бикар қилмиған болсиму, әмма, қәдәмму - қәдәм 2011 - йилидин башлап, мәзкур китаб бойичә оттура мәктәп пүттүрүш үчүн имтиһан беришни әмәлдин қалдурған. Мана әмди бу китабтин алий мәктәпләргә кириш имтиһани елишни бикар қилған.

«Роһнамә» намлиқ ниязофниң дөләт дәстури сүпитидә бекитилгән мәзкур әсәр явропа тиллири вә бир қисим түркий тилларғиму тәрҗимә қилинған иди.

Пикирләр (0)
Share
Толуқ бәт