Xitay kompartiyisi organ zhurnili muherririning ésilip ölüwélishining tepsilati xitayda cheklendi

Muxbirimiz méhriban
2016-06-28
Élxet
Pikir
Share
Print

Xewerlerdin melum bolushiche, ötken yekshenbe küni xitay kompartiyisining organ zhurnili "Heqiqetni emeliyettin izdesh" zhurnilining muherriri 56 yashliq ju téji 26-iyun yekshenbe küni seherde özi ishlewatqan idarining yer asti aptomobil toxtitish zalida ésilip ölüwalghan.

"Xelq tori" ning 26-iyun yekshenbe kechtiki sanida, "Béyjing sheherlik félyeton jem'iyitining mu'awin bashliqi, 'heqiqetni emeliyettin izdesh' zhurnilining mu'awin bash muherriri, ju téji yekshenbe küni seherde tuyuqsiz wapat boldi" dégen qisqa xewer bérilip, uning ölümining tepsilati we sewebi heqqide héchnéme déyilmidi. Emma xitaydiki maliye gézitining yekshenbe kech oxshash waqitta bérilgen xewiride, ju téjining özini öltürüwalghanliqi tilgha élin'ghan, lékin mezkur xewer birnechche sa'et ichidila öchürüwétilgen. Xitaydin radiyomiz ziyaritini qobul qilghan bir neper muxbirning ashkarilishiche, xitay hökümet da'iriliri 27-iyun düshenbe küni uqturush chiqirip, muxbirlarning ju téjining ölümi heqqide tepsiliy xewer bermeslikini, bu heqtiki qisqa xewerlerde hökümetning uqturushidiki uchurlarni asas qilishni telep qilghan.

Ju téjini yéqindin bilidighan xitay ziyaliylirining radiyomizgha bildürüshiche, ju téji özini öltürüwélishtin 10 kün ilgiri échilghan félyeton muhakime yighinida, félyetonning partiyiwiyliki we xelqchilliqi heqqide öz qarishini bayan qilghan. Xitay kommunist hökümitining organ zhurnilining mu'awin bash muherriri bolghan ju téji kompartiye hakimiyitining himayichiliridin bolsimu, emma u xaraktér jehettin nisbeten keng siyasetni teshebbus qilip, maqaliliride xelq rayini asas qilishni otturigha qoyghan. Emma yéqinqi ikki yildin buyan uning muherrirlikidiki "Heqiqetni emeliyettin izdesh" zhurnilida solchil idiyidiki eserler köplep élan qilinishqa bashlighan. Zhurnalning mu'awin muherriri bolghan ju téjiningmu xizmitidin chetleshtürülgenliki we barghanche soghuq mu'amilige uchrighanliqi zhurnalda ishligüchi xizmetchilerning hemmisi bilidighan ashkara mexpiyetlikke aylan'ghan.

Toluq bet