Ürümchide Uyghur nopusi 3 yilda 78 ming kémeygen

Muxbirimiz shöhret hoshur
2019-03-26
Élxet
Pikir
Share
Print

Xitay da'iriliri yéqinda élan qilghan Uyghur aptonom rayonining 2018-yilliq nopus istatéstikisidin melum bolushiche, ürümchi nopusi 2017-yili 12-ayning axiri 287632 ge chüshken؛ ürümchidiki Uyghur nopusi 2014-yili 365638 bolup, aridin 3 yil ötkende 78006 nopus kémiyip ketken.

Istatéstika jedwilidin yene bayqilishiche, ürümchidiki Uyghur nopusi kémiyishi tengritagh rayonida gewdilik bolghan. Tengritagh rayonining 2014-yilidiki Uyghur nopusi 177607 bolup, bu san nöwette 128423 ke chüshken, yeni 49184 jan kémeygen. Xitay da'iriliri 2009-yili ürümchi weqesi yüz bergendin kéyin ürümchidiki köchme nopusqa qarita tazilash herikiti qozghap, zor bir türküm Uyghurlarni ürümchidin heydigen.

Közetküchilerning déyishiche shu chaghdimu ürümchidiki Uyghur nopusida bu derijide töwenlesh bolmighan. Ürümchidiki Uyghur nopusining 21.33% Töwenlishi, muhajirettiki Uyghur pa'aliyetchiliri teripidin rayondiki yighiwélish lagérliri bilen biwasite munasiwetlik dep qaralmaqta.

Washin'gtondiki pa'aliyetchi tahir iminning déyishiche, ürümchide lagér üchün tutulghanlar asasen özlirining esli yurtidiki lagérlargha élip kétilgen. Ilgiriki éniqlashlirimiz dawamidimu uzun yillardin béri ürümchide yashap kéliwatqan naxshichi zahir shah ablimitning atushtiki 5-lagérda ikenliki delillen'gen idi.

Toluq bet