Уйғур дияридики сиясий бастуруш «қара вә рәзил күчләргә зәрбә бериш» намидиму давам қилдурулмақчи

Мухбиримиз әзиз
2019-09-10
Елхәт
Пикир
Share
Принт

Йеқинда уйғур аптоном районлуқ һөкүмәт вә партком ишханиси «қара вә рәзил күчләргә зәрбә бериш» мәркизий ишханисиға қарашлиқ 21-назарәт гурупписиниң бу җәһәттики хизмәтләр һәққидә чиқарған баһалаш нәтиҗисигә асасән өзлириниң бундин кейинки хизмәтләрни қандақ өзгәртидиғанлиқи вә қандақ сәвийәдә давам қилидиғанлиқи тоғрисидики «хизмәтләрни тәртипкә селиш вә өзгәртиш лайиһәси» ни бесип тарқатқан.

Шуниңдәк пүтүн уйғурлар дияридики һәр дәриҗилик орунларниң буни қәтий иҗра қилишини тәләп қилған.

«Тәңритағ тори» ниң 10-сентәбирдики хәвиридә ейтилишичә, «қара вә рәзил күчләргә зәрбә бериш» мәркизий ишханисиға қарашлиқ 21-назарәт гурупписи уйғурлар дияридики даириләрниң бу җәһәттики хизмәтлириниң йетәрлик болмиғанлиқи, буниңда алтә чоң түр бойичә 59 хил йетәрсизлик вә башқа көплигән кәмтүклүкләрниң барлиқини билдүргәнлики үчүн бу мәсилиләрни һәл қилишниң бир қатар йеңи чарилири түзүп чиқилған.

Бу йеңи хизмәт лайиһәсидә «йеңи дәврдики компартийәниң шинҗаңни идарә қилиш истратегийәси, болупму иҗтимаий муқимлиқ вә узақ мәзгиллик әминлик орнитиш нишани бойичә қара вә рәзил күчләргә қарши күрәшни муқимлиқни сақлаш билән зич бирләштүрүш, бу һални үч йилғичә изчил давам қилдуруш» ниң бундин кейинки хизмәтләрдә баш йетәкчи идийә болидиғанлиқи алаһидә тәкитләнгән.

Йеңи «хизмәт лайиһәси» дә бундин кейинки хизмәтләрниң муһим нишани мәркизий ишхана көрситип бәргән мәсилиләрни толуқ һәл қилған асаста «қара вә рәзил күчләргә зәрбә бериш һәрикити» ни давам қилдуруш икәнлики, буниңда қатламму-қатлам мәсулийәтни өз үстигә алған һалда бәш дәриҗилик секретарлар «қолму-қол иш көрүш, қатламму-қатлам бесимни йәткүзүш» роһи бойичә бу хизмәтни узақ мәзгил давам қилдуруш икәнлики көрситилгән.

Бу хилдики йеңи хизмәт нишани, йеңи хизмәт усули, йеңи хизмәт тәлипи бойичә «қара вә рәзил күчләргә зәрбә бериш» тәк хизмәт лайиһиси тоғрисида пикир қилғанлардин д у қ ниң баянатчиси дилшат решит: «шунчә көп уйғур сәрхиллирини қара күчләргә бағлап йоқитип болған хитай һөкүмитиниң бу хизмәтни йетәрлик болмиған, дәп қариғанлиқиниң өзи бундин кейин һечқандақ бир уйғур кадирниң аман қалмайдиғанлиқидин берилгән бир түрлүк бешарәт» дәп көрсәтти.

Пикирләр (0)
Share
Толуқ бәт