Uyghur diyaridiki siyasiy basturush "Qara we rezil küchlerge zerbe bérish" namidimu dawam qildurulmaqchi

Muxbirimiz eziz
2019-09-10
Élxet
Pikir
Share
Print

Yéqinda Uyghur aptonom rayonluq hökümet we partkom ishxanisi "Qara we rezil küchlerge zerbe bérish" merkiziy ishxanisigha qarashliq 21-nazaret guruppisining bu jehettiki xizmetler heqqide chiqarghan bahalash netijisige asasen özlirining bundin kéyinki xizmetlerni qandaq özgertidighanliqi we qandaq sewiyede dawam qilidighanliqi toghrisidiki "Xizmetlerni tertipke sélish we özgertish layihesi" ni bésip tarqatqan.

Shuningdek pütün Uyghurlar diyaridiki her derijilik orunlarning buni qet'iy ijra qilishini telep qilghan.

"Tengritagh tori" ning 10-séntebirdiki xewiride éytilishiche, "Qara we rezil küchlerge zerbe bérish" merkiziy ishxanisigha qarashliq 21-nazaret guruppisi Uyghurlar diyaridiki da'irilerning bu jehettiki xizmetlirining yéterlik bolmighanliqi, buningda alte chong tür boyiche 59 xil yétersizlik we bashqa köpligen kemtüklüklerning barliqini bildürgenliki üchün bu mesililerni hel qilishning bir qatar yéngi chariliri tüzüp chiqilghan.

Bu yéngi xizmet layiheside "Yéngi dewrdiki kompartiyening shinjangni idare qilish istratégiyesi, bolupmu ijtima'iy muqimliq we uzaq mezgillik eminlik ornitish nishani boyiche qara we rezil küchlerge qarshi küreshni muqimliqni saqlash bilen zich birleshtürüsh, bu halni üch yilghiche izchil dawam qildurush" ning bundin kéyinki xizmetlerde bash yétekchi idiye bolidighanliqi alahide tekitlen'gen.

Yéngi "Xizmet layihesi" de bundin kéyinki xizmetlerning muhim nishani merkiziy ishxana körsitip bergen mesililerni toluq hel qilghan asasta "Qara we rezil küchlerge zerbe bérish herikiti" ni dawam qildurush ikenliki, buningda qatlammu-qatlam mes'uliyetni öz üstige alghan halda besh derijilik sékrétarlar "Qolmu-qol ish körüsh, qatlammu-qatlam bésimni yetküzüsh" rohi boyiche bu xizmetni uzaq mezgil dawam qildurush ikenliki körsitilgen.

Bu xildiki yéngi xizmet nishani, yéngi xizmet usuli, yéngi xizmet telipi boyiche "Qara we rezil küchlerge zerbe bérish" tek xizmet layihisi toghrisida pikir qilghanlardin d u q ning bayanatchisi dilshat réshit: "Shunche köp Uyghur serxillirini qara küchlerge baghlap yoqitip bolghan xitay hökümitining bu xizmetni yéterlik bolmighan, dep qarighanliqining özi bundin kéyin héchqandaq bir Uyghur kadirning aman qalmaydighanliqidin bérilgen bir türlük bésharet" dep körsetti.

Toluq bet