Вашингтон, ню-йорк вә бостонда шәрқий түркистан җумһурийәт күни хатириләнди

Мухбиримиз җәвлан
2020-11-12
Елхәт
Пикир
Share
Принт

1933-Йил вә 1944-йил 12-ноябир күни қурулған икки қетимлиқ шәрқий түркистан җумһурийити хатирилиниватқан бүгүнки күндә американиң вашнгтон, ню-йорк вә бостон қатарлиқ шәһәрлиридә тәбрикләш паалийәтлири өткүзүлди.

Өткән әсирниң 30-вә 40-йиллирида қурулған икки қетимлиқ шәрқий түркистан җумһурийити уйғурларниң мустәқиллиқ ирадиси вә мустәқиллиқ күришиниң улуғ нәтиҗиси болуп, та бүгүнгичә уйғурларға мустәмликичилик зулумлириға тиз пүкмәсликтәк миллий роһни ата қилип кәлди. Паалийәтчиләрниң қаришичә, бир-бириниң давами болған бу икки җумһурийәтниң туғулған күнини хатириләш вә қәдирләш бүгүнки күндә хитайниң ирқий қирғинчилиқиға учраватқан уйғур хәлқиниң зулумға бирдәк қарши туруш роһини күчәйтидикән һәмдә хитай мустәмликисиидин қутулуп, азадлиққа еришиш ирадисини мустәһкәмләйдикән.

Бу мунасивәт билән бүгүн дуня уйғур қурултийи, уйғур һәрикити тәшкилати вә америка уйғур академийәси қатарлиқ тәшкилатлар бирликтә баш шитаби ню-йорктики бирләшкән дөләтләр тәшкилатиниң бинаси алдида шәрқий түркистан җумһурийитиниң мустәқиллиқ күнини хатирилиди. Паалийәтчиләрниң қаришичә, бирләшкән дөләтләр тәшкилатиниң ню-йорктики бинаси алдида шәрқий түркистанниң ай-юлтузлуқ көк байриқини чиқириш мурасими күчлүк символлуқ әһмийәткә игә болуп, пүтүн дуняға уйғур хәлқиниң әркин, һөр вә мустәқил яшаш ирадисини намаян қилидикән.

Америка уйғур бирләшмиси өткән йили җумһурийәт күнини хатириләп чоң паалийәт өткүзгәниди, бу йил корона вируси сәвәбидин бундақ паалийәт өткүзәлмигән болсиму, әмма бүгүн вашнигтондики хитай әлчиханиси алдида шәрқий түркистан байриқини чиқириш мурасими өткүзди.

Бостондики уйғурларму бүгүн бостон уйғур уюшмисиниң риясәтчиликидә бостон шәһәр мәркизидә шәрқий түркистан дөләт нахшиси ейтиш вә шәрқий түркистан байриқиини чиқириш мурасими өткүзди.

Буниңдин башқа, 12-ноябир күни дуняниң һәр қайси җайлиридики уйғур җамаити уйғур тәшкилатлириниң уюштуруши билән ахбарат елан қилиш йиғини ечиш, шәрқий түркистанниң ай-юлтузлуқ көк байрақини чиқириш вә дөләт марши оқуш, нутуқ сөзләш қатарлиқ һәр хил шәкилләр арқилиқ шәрқий түркистан җумһурийәт күнини хатирилиди.

Пикирләр (0)
Share
Толуқ бәт