Уйғур әмәлдар «сиясий интизам вә сиясий қаидә» гә еғир хилаплиқ қилиш җинайити билән әйибләнгән

Мухбиримиз ирадә
2020-03-26
Елхәт
Пикир
Share
Принт

Или областлиқ интизам тәкшүрүш комитети партийә интизамиға хилаплиқ қилиш җинайити бойичә 4 кишини җазалиған болуп, уларниң ичидә бир нәпири уйғур. Әхмәтҗан мәмәт исимлик бу уйғур или областлиқ партийә комитети сиясий тәтқиқат ишханисиниң сабиқ муавин мудири, деһқанчилиқ ишлири ишханисиниң сабиқ муавин мудири икән.

Хитай хәвәрләр ториниң бу һәқтики хәвиридин қариғанда, даириләр әхмәтҗанни «сиясий мәйдани кәмчил, партийәгә садиқ болмиған, сиясий интизам вә сиясий қаидигә еғир хилаплиқ қилған; партийә интизами вә дөләт қануниға писәнт қилмиған» дегәнләр билән әйиблигән. Әйибнамидә йәнә, униң «кадир вә хизмәтчиләрни қобул қилиш вә өстүрүшкә арилашқанлиқи, коллектип байлиқиниң тәқсимлинишигә арилашқанлиқи шундақла өйләрни бәлгилимигә хилап һалда бөлгәнлики» му әскәртилгән.

Диққәт қозғайдиғини, бу нөвәт җазаланған 4 киши ичидики бирдин-бир уйғур болған әхмәтҗанниң җазаси башқа хитай әмәлдарлардин көрүнәрлик дәриҗидә еғир болған. Униңда әхмәтҗанниң сиясий вә иқтисадий мәсилилириниң бир-биригә гирәлишип кәткәнлики тилға елинип, «партийә әзалиқ салаһийитини бикар қилиш, пенсийә тәминатини бикар қилиш, ; мал-мүлкини мусадирә қилиш, чириклик, парихорлуқ вә башқа җинайи қилмишлирини әдлийә органлириға өткүзүп бериш» қатарлиқлар билән җазаланған. Қалған хитай әмәлдарлар болса асасән вәзиписидин бошитилиш, партийәдин қоғлап чиқирилиштәк җазалар билән җазаланған.

Уйғур елидә 2016-йилидин башлап, нурғун уйғур әмәлдарлири «партийәгә садиқ болмаслиқ, сиясий мәйдани кәмчил болуш» вә «икки йүзлимичилик қилиш» дегәндәк җинайәтләр билән қаттиқ бир тәрәп қилинмақта.

Пикирләр (0)
Share
Толуқ бәт