Уйғур районлуқ көмүр кан идариси муавин башлиқи мәмәт турди «бөлгүнчиликкә қарши күрәш интизами» ға хилаплиқ қилиш билән әйибләнди

Мухбиримиз ирадә
2017-03-30
Елхәт
Пикир
Share
Принт

Бүгүн тәңритағ торида берилгән бир хәвәрдә, уйғур аптоном районлуқ көмүр кан идарисиниң муавин башлиқи мәмәт турдиниң «сиясий интизам вә бөлгүнчиликкә қарши күрәш интизами» ға еғир хилаплиқ қилғанлиқи үчүн вәзиписидин елип ташланғанлиқи хәвәр қилинди.

Бу хәвәр чәтәлләрдики көзәткүчиләрниң алаһидә диққитини қозғиди. Уларниң ейтишичә, бу һазирғичә уйғур елида «аттин ғулиған» уйғур әмәлдарлар ичидә бөлгүнчиликкә қарши туруштики мәйдани сәвәблик вәзипиисдин қалдурулғанлиқи ениқ қилип тилға елинған тунҗи бир вәқә һесаблинидикән.

Мәмәт турди һәққидики 30-март күни тарқитилған хәвәрдә, униң сиясий интизамға, бөлгүнчиликкә қарши күрәш интизамиға еғир дәриҗидә хилаплиқ қилип, тәшкилниң тәкшүрүшигә қарши чиққанлиқи, өзидики мәсилиләрни вақтида тапшурмай тәшкил интизамиға хилаплиқ қилғанлиқи илгири сүрүлгән. Униңға юқиридики җинайәттин башқа парихорлуқ, башқилар билән қалаймиқан мунасивәт орнитиш дегәндәк җинайәтләрму бирликтә артилған.

Уйғур аптоном райониниң партком секритари йеқиндин буянқи сөзлиридә партийә ичидики сиясий мәйдани ениқ болмиған, «икки йүзлимичи» әмәлдарларни тазилаш мәсилисини алаһидә тәкитләватқан иди. У буни «муқимлиқ вәзийити яритиштин ибарәт баш нишанға йетиштики әң муһим һалқа», дәп көрситип, уларниң қаттиқ җазалиниши керәкликини ейтқан. Көзәткүчиләр мәмәт турдиниң делосини дәл мушу сиясәткә мунасивәтлик, дәп қаримақта.

Бундин илгири, хотән вә қәшқәр вилайәтлиридә бир қисим кадир вә әмәлдарлар «партийә билән мәйдани бирдәк болмиди», «вәзиписигә сәл қариди» дәп әйиблинип вәзиписидин қалдурулған иди.

Пикирләр (0)
Share
Толуқ бәт