Уйғур районида 10 нәпәр кадир «қара күчләр вә рәзилликкә мудапиә күнлүки болған» дәп тутқун қилинған

Мухбиримиз әркин
2019-05-13
Елхәт
Пикир
Share
Принт

Уйғур районида кәң қанат яйдурулуватқан «қара күчләр вә рәзиллик» кә зәрбә бериш һәрикитидә 10 нәпәр кадир «қара күчләр» ниң «мудапиә күнлүки» болған, дәп әйиблинип, тутқун қилинған.

Хитай һөкүмити йил йилниң башлирида «қара күчләр вә рәзилик» кә зәрбә бериш намида йеңи сияси һәрикәт қозғап, бу һәрикәт уйғур аптоном райониниң һәр қайси йеза-қишлақлириғичә кеңәйтилгән. Мәзкур һәрикәт иҗтимаий қилмишларға қаритилғандәк қилсиму, лекин униң йәрлик хәлқ ичидики диний вә сиясий хаһишларға зәрбә беришниму өз ичигә алғанлиқи мәлум болған иди.

Уйғур аптоном районлуқ интизам тәкшүрүш вә ревизийә комитетиниң елан қилишичә, бу 10 киши «қара күчләр вә рәзилик» кә зәрбә бериш һәрикитидә уларға «мудапиә күнлүки» болған, дәп әйиблинип тутқун қилинған кадирларниң ичидики типик 10 дело икән. Лекин, уйғур аптоном районлуқ интизам тәкшүрүш вә ревизийә комитети һазирғичә зади қанчә кадирниң шу сәвәблик тутқун қилинғанлиқини елан қилмиған. Хәвәрдин мәлум болушичә, тутқунларниң аз дегәндә 4 нәпири йәрлик милләт, қалғини хитай болуп, уларниң һәммиси партийәдин қоғлап чиқирилған. Шундақла вәзиписидин елип ташлинип, хитай әдлийә органлириниң бир тәрәп қилишиға тапшурулған.

Мәлум болушичә, нөвәттә уйғур райониниң һәр қайси йеза-қишлақлирида пуқралар «қара күчләр вә рәзиллик» кә «мудапиә күнлүки» болған, дәп һесаблиған йәрлик кадирларни паш қилишқа тәшкилләнмәктикән. Ават наһийәсиниң бағтоғрақ йезиси қаракүрҗәк кәнти бу һәрикәт әң шиддәтлик елип бериливатқан кәнтләрниң биридур. «Ақсу гезити» ниң ашкарлишичә, мәзкур кәнттә «дүшмәнгә ғәзәп нәпрәт яғдуруш, һәммә адәм зәрбә бериштәк қоюқ кәйпият шәкилләндүрүлүп, аммақара, рәзил күчләргә аит җинайи қилмишларни паш қилишқа сәпәрвәр қилинған.» Лекин кишилик һоқуқ тәшкилатлириниң илгири сүрүшичә, хитай һөкүмити тәкитләватқан «қара, рәзил күчләр» дегән бу сөз интайин мүҗимәл бир уқум болуп, у техиму көп кишиниң тутқун қилиниши, лагерларға қамилиши яки кесилишини кәлтүрүп чиқиридикән.

Пикирләр (0)
Share
Толуқ бәт