Xitay da'iriliri Uyghur medeniyitini "Xitaychilashturush" qa tirishmaqta

Muxbirimiz sada
2019-07-10
Élxet
Pikir
Share
Print

Nöwette xitayning Uyghur medeniyitini yoq qilishqa urunushi xelq'arada küchlük qarshiliqlarni peyda qiliwatqan peytte, béyjing da'iriliri yéqinda Uyghur diyaridin élip kelgen 191 dane medeniyet buyumini körgezmige qoyghan we bu arqiliq rayonning ezeldin xitay térritoriyesi ikenlikini teshwiq qilghan.

Xitayning hökümet awazi bolghan "Yershari waqti" gézitining 10-iyuldiki sanida élan qilin'ghan munasiwetlik maqalidin melum bolushiche, béyjing da'iriliri körgezme buyumliri arqiliq Uyghur diyarining xitayning xen sulalisi dewridin bashlapla xitay térritoriyesige tewe ikenlikini, "Jang chiyenning gherbke seper qilishining" "Yipek yoli" ning qurulushigha zor töhpe qoshqanliqini tekitleshken.

Közetküchiler buninggha qarita xitay hökümitining ilgirikige oxshashla "Shinjang ezeldin junggoning bir qismi", bu jayda ezeldinla köp millet, köp xil medeniyet we köp xil dinlar mewjut bolghan, Uyghurlar bu jaygha köchüp kelgen, xitaylar ezeldin shinjangda yashighan dégendek "Teshwiqat" lirini téximu kücheytiwatqanliqini bildürmekte.

Xewerde yene körgezmige qoyulghan süretler ichidin turpandiki bir qebrining süritiningmu barliqi éytilghan. Melum bolushiche, xitay da'iriliri mezkur sürettin shu yerlik kishilerning kiyim-kéchekliri we ishletken buyumlirining xitaydiki xu'angxé deryasi boyida yashaydighan xitay puqralar bilen oxshashliqi barliqini körüwalghili bolidighanliqini qeyt qilghan.

Nöwette, Uyghur élide Uyghur til-yéziqi, medeniyitining ornini xitay tili we medeniyiti igiliwatqan, Uyghur ziyaliylar xitay hökümitining nishanliq zerbe bérish obyéktigha ayliniwatqan peytte, béyjing da'irilirining yuqiriqidek körgezmilerni uyushturushi közetküchilerning diqqitini qozghidi.

Ular, buning xitay hökümitining Uyghur medeniyitini pütünley "Xitaychilashturup", Uyghur milliy kimlikini tüptin yoq qilish, Uyghurlarda "Jungxu'a medeniyiti" we "Jungxu'a milliti" kimlikini turghuzushqa urunushining roshen ipadisi ikenlikini ilgiri sürüshmekte.

Toluq bet