Америка ташқи ишлар министирлиқиниң мунбири «Share America» да уйғурлар тонуштурулди

Мухбиримиз ирадә
2019-01-30
Елхәт
Пикир
Share
Принт

Америка ташқи ишлар министирлиқиниң «Share America» намлиқ тор мунбиридә бүгүн мәхсус уйғурлар тонуштурулған бир парчә кәң көләмлик мақалә елан қилинди. «Уйғурлар ким?» мавзусида елан қилинған мақалидә, уйғурларниң хитайниң ғәрбий шималидики кәң җуғрапийәлик районда әсирләрдин бери яшап кәлгән түркий хәлқ икәнлики, хитайчә «йеңи чегра» дегән мәнини ипадиләйдиған «шинҗаң» дәп атиливатқан бу земинда уйғурларниң икки қетим мустәқил җумһурийәт қурғанлиқидәк тәпсилатлар баян қилинған.

Мақалидә йәнә хитай һөкүмитиниң уйғур елидә изчил һалда миллий кәмситиш вә бесим сиясити йүргүзгәнлики, уйғур нопусини шалаңлаштуруш вә районниң байлиқ мәнбәлирини ечиш үчүн пиланлиқ һалда милйонлап хитайни көчүргәнлики, хитай һөкүмитиниң уйғурлар вә башқа аз санлиқ милләтләргә қаратқан тәңсиз сиясәтлириниң нәтиҗисидә уйғурларниң бир қанчә қетим хитай һөкүмитигә қарши наразилиқ намайиши қилғанлиқи, гаһида зораванлиқ һадисилири йүз бәргәнлики һәққидә мәлуматлар берилгән.

Хитай һөкүмитиниң «радикаллиқ» қа вә «бөлгүнчилик» кә қарши туруш нами астида уйғур елидә 800 миңдин 2-милйонғичә уйғур вә башқа мусулман хәлқләрни лагерларға қамаш арқилиқ уларни җисманий вә роһий җәһәттин қийнаватқанлиқи тилға елинған бу мақалидә «уйғурлар һазир дунядики әң көләмләшкән сақчи дөлитиниң нишаниға айланмақта» дейилгән.

Мақалидә ейтилишичә, америка ташқи ишлар министири майк помпейо бултур 10-айда мухбирға қилған сөзидә лагерлар һәққидә тохтилип: «бу лагерлар арқилиқ хитай һөкүмитиниң хәлқниң дини әркинликини боғушни мәқсәт қилғанлиқи ениқ. Америка һөкүмити инсанларниң әң асасий һоқуқиға қилиниватқан бу чәклимигә қарши һәрикәткә өтиду» дегән икән.

Пикирләр (0)
Share
Толуқ бәт