Amérika tashqi ishlar ministirliqining munbiri "Share America" da Uyghurlar tonushturuldi

Muxbirimiz irade
2019-01-30
Élxet
Pikir
Share
Print

Amérika tashqi ishlar ministirliqining "Share America" namliq tor munbiride bügün mexsus Uyghurlar tonushturulghan bir parche keng kölemlik maqale élan qilindi. "Uyghurlar kim?" mawzusida élan qilin'ghan maqalide, Uyghurlarning xitayning gherbiy shimalidiki keng jughrapiyelik rayonda esirlerdin béri yashap kelgen türkiy xelq ikenliki, xitayche "Yéngi chégra" dégen menini ipadileydighan "Shinjang" dep atiliwatqan bu zéminda Uyghurlarning ikki qétim musteqil jumhuriyet qurghanliqidek tepsilatlar bayan qilin'ghan.

Maqalide yene xitay hökümitining Uyghur élide izchil halda milliy kemsitish we bésim siyasiti yürgüzgenliki, Uyghur nopusini shalanglashturush we rayonning bayliq menbelirini échish üchün pilanliq halda milyonlap xitayni köchürgenliki, xitay hökümitining Uyghurlar we bashqa az sanliq milletlerge qaratqan tengsiz siyasetlirining netijiside Uyghurlarning bir qanche qétim xitay hökümitige qarshi naraziliq namayishi qilghanliqi, gahida zorawanliq hadisiliri yüz bergenliki heqqide melumatlar bérilgen.

Xitay hökümitining "Radikalliq" qa we "Bölgünchilik" ke qarshi turush nami astida Uyghur élide 800 mingdin 2-milyon'ghiche Uyghur we bashqa musulman xelqlerni lagérlargha qamash arqiliq ularni jismaniy we rohiy jehettin qiynawatqanliqi tilgha élin'ghan bu maqalide "Uyghurlar hazir dunyadiki eng kölemleshken saqchi dölitining nishanigha aylanmaqta" déyilgen.

Maqalide éytilishiche, amérika tashqi ishlar ministiri mayk pompéyo bultur 10-ayda muxbirgha qilghan sözide lagérlar heqqide toxtilip: "Bu lagérlar arqiliq xitay hökümitining xelqning dini erkinlikini boghushni meqset qilghanliqi éniq. Amérika hökümiti insanlarning eng asasiy hoquqigha qiliniwatqan bu cheklimige qarshi heriketke ötidu" dégen iken.

Toluq bet